قىلىمسۋدىڭ مىندەتتى مولشەرى
ماحاببات ماسەلەسىنە تىم بوساڭ، تىم مەنمەن قارايتىن ايەلگە مەنىڭ دە وسىعان ۇقساس ءسوزدى ايتقىم كەلىپ كەتەتىنى بار: «قىلىمسۋ، حانىمىم! نەنى مەنسىنبەي جۇرگەنىڭىزدى ءوزىڭىز دە تۇسىنبەيسىز».
قىلىمسۋ ىقىلىم زاماننان وسى كۇنگە دەيىن وراسان كۇشكە يە ءارى قاۋىپتى قارۋ. ماريۆو مۇقيات زەرتتەگەن شەبەر ايلا تاسىلدەر جيىنتىعىنىڭ نەگىزى مىنالار: الدىمەن قىزىقتىرۋ، كەيىن ەلەمەۋ، بىردەڭە سىيلاعانداي ءتۇر كورسەتىپ، ارتىنشا قايتا تارتىپ الۋ.
بۇل ويىننىڭ ناتيجەسى تاڭقالارلىق. تۇزاقتىڭ وسىلاي قۇرىلاتىنىن بەسكە بىلسەڭ دە، مىندەتتى تۇردە ءتۇسىپ قالاسىڭ.
زەيىن قويىپ ويلانساق، بۇل تابيعي نارسە. جەڭىل نازدى قىلىق ءۇمىت ۇشقىنىن جىلت ەتكىزبەسە، كوپ ادامداردا ماحاببات تا تۇتانبايدى. «ءسۇيۋ - الدەقانداي مۇمكىندىك تۋرالى ويلاعان كەزدە قوبالجۋ، ول كەيىن قاجەتتىلىككە، سودان سوڭ تەگەۋرىندى قالاۋعا، بارا بارا، قۇتىلا المايتىن جابىسقاق ويعا اينالاتىن سەزىم».
الدەبىر جىگىتتىڭ (نە ايەلدىڭ) كوزىنە ءتۇسۋىم مۇلدەم مۇمكىن ەمەس دەسەك، ءبىز ول تۋرالى ءتىپتى ويلامايمىز دا. ەشكىم انگليا پاتشايىمى بولمادىم دەپ قايعىرمايدى عوي. كەز كەلگەن ەركەك كىندىكتى گرەتا گاربو نەمەسە ميشەل مورگان ەرەكشە سۇلۋ جاراتىلعان ايەلدەر دەپ ەسەپتەيدى، ولارعا تامسانا قارايدى، ءبىراق عاشىق بولىپ، ماحابباتتان قۇسا بولىپ جاتقان ەشكىم جوق. ولار سانسىز تابىنۋشىلارى ءۇشىن تەك ەكراندا ءومىر سۇرەتىن بەينەلەر عانا. ەشكىمدى ۇمىتتەندىرمەيدى دە.
ال بىرەۋدىڭ كوز توقتاتا قاراعانىن، كۇلىمسىرەگەنىن، ايتقان ءسوزىن نە يشاراسىن وزىمە ارنالدى دەپ قابىلداساق بولدى، قيالىمىز ەركىمىزدەن تىس الىستارعا جەتەلەپ اكەتەدى. بىرەۋ بايقالار-بايقالماس ءۇمىت وتىن جىلت ەتكىزدى مە؟ سول ساتتەن باستاپ ءدۇدامال ويدى اينالسوقتاپ قۇتىلا الماي قالامىز.
«شىنىمەن ماعان كوڭىل اۋداردى ما؟ ءبىراق مەنى نە قىلسىن... مۇمكىن ەمەس. دەگەنمەن، قىلىقتارىنا قاراساڭ...» وسىنداي كۇدىكتەر جانعا مازا بەرمەيدى.
قىسقاسى، ستەندال ايتقانداي، سول كىسى تۋرالى ويدى «كريستالدايمىز». باسقاشا ايتقاندا، زالتسبۋرگ كەندەرىندەگى تۇز كريستالدارىنىڭ بارلىق زاتتاردى ءتۇرلى ءتۇستى ەتىپ قۇبىلتاتىنى سەكىلدى، قيالىمىزدى قىزىلدى جاسىلدى تۇسكە بوياپ جايناتىپ جىبەرەمىز.
قالاۋ اقىرىنداپ كۇندىز-ءتۇنى ميدى قاشايتىن تۇراقتى ويعا اينالادى.
وسىنداي ەلىكتىرمە كۇيدى ۇزارتا ءتۇسىپ، ەركەكتىڭ ەسىن العىسى كەلەتىن نازدى بيكەش اتام زاماننان كەلە جاتقان ادىسكە باسسا بولعانى: «قۋساڭىز قارسى ەمەسپىن» دەگەن يشارا تاستاي قاشۋ، «بالكىم قولىڭىزعا تۇسەرمىن» دەگەن ءۇمىت ۇقشىنىن شاشىپ قالدىرىپ كەتۋ. سوندا اڭعال ازاماتتار قىردىڭ قىزىل تۇلكىسىنىڭ سوڭىنان بۇلكەكتەپ ەرە بەرەرى ءسوزسىز.
ەگەر بيكەش مۇنداي امال-ايلالاردى كوپتەگەن قاستەرلەۋشىلەرىن ساندالتۋ ءۇشىن پايدالانسا، جازعىرۋعا تۇرارلىق قىلىق. مۇنداي ءجۇرىس تۇرىس ارۋدىڭ ءوزىن وتىرىك ايتۋعا، قوبالجۋعا ماجبۇرلەپ، جۇيكەسىن توزدىرادى.
تەك اسا ەپتىلىكپەن ەركەكتەردىڭ نامىسىنا تيمەي ەشكىمنەن ۇتىلماۋدىڭ جولىن تاپسا، ءوزى قينالماۋى كادىك. ءبىراق قىلىقتىلىعىمەن ايگىلى بيكەشتىڭ ءوزى تۇبىندە عاشىقتارىنىڭ ءتوزىمىن تاۋىسىپ الۋى مۇمكىن. مولەردىڭ سەليمەناسى سەكىلدى، بىرنەشە قايىقتىڭ قۇيرىعىن ۇستايمىن دەپ، سۋعا كەتەدى.
ەگەر ماقساتى سۇيەتىن ادامىنىڭ ىڭكارلىگىن ساقتاپ قالۋ بولسا، قىلىقتىلىق جەڭىلتەكتىك ەمەس، كەرىسىنشە، ءتىپتى مىندەتتى امال. بۇل جاعدايدا ايەل شىن مانىندە قىلىمسۋدى ەش قالامايدى.
«ماحابباتتىڭ ۇلى عاجايىبى - قىلىمسۋدان ەمدەپ جازۋى».
ەسسىز عاشىق ايەل قىلىمسۋسىز، قىلمىڭداۋسىز، جالعان قىلىقسىز، شىن پەيىلمەن قۇلاي بەرىلۋگە بەيىل. الايدا، ايەلگە عاشىعىن ازداپ قيناۋىنا تۋرا كەلەدى. سەبەبى سۇيىكتىسى وڭاي ولجانى مىسە تۇتپايتىن، قينالعان سايىن قىزىعا تۇسەتىن، كۇمان تورلاپ، بەل شەشە الماي جۇرەتىن ەركەكتەر قاتارىنان عوي.
وندا پاراساتتى دا ارلى بولعانمەن عاشىق ايەلدىڭ ءوزى ەركەكتىڭ قۇشتارلىعىنان ايىرىلىپ قالماس ءۇشىن قىلىمسي قىلىق بىلدىرسە ۇياتتى ءىس بولماسا كەرەك. بۇل مەيىربيكەنىڭ ناۋقاس دەنساۋلىعى ءۇشىن كەيدە اياۋسىز بولۋىنا تۋرا كەلەتىنى سەكىلدى جاعداي. ينە جانعا باتسا دا، شيپالى. قىزعانىش ازاپقا سالعانمەن، سەزىمدى نىعايتادى. ەگەر ءسىز كۇندەردىڭ كۇنىندە ءوزىڭىزدى تانۋىما مۇمكىندىك بەرسەڭىز، قىلمىڭداعان سىلقىم بولماڭىز. ايتپەسە مەن باسقا كەز-كەلگەن ەركەك سەكىلدى مىندەتتى تۇردە تۇتىلىپ قالامىن. قوش بولىڭىز.
اندرە مورۋا
اۋدارعان قۇرالاي رايسوۆا
blogtime.kz
