امەريكالىق ستۋدەنت وبامانىڭ حاتىن ساتىلىمعا شىعاردى
گرەيندجەر ا ق ش پرەزيدەنتىنە 2011 - جىلى حات جازىپ، ءوزىنىڭ اۋىر ءومىرى تۋرالى بايانداعان. بوزبالانىڭ ايتۋىنشا، ول 13 جاسىندا وگەي اناسىنان ايرىلىپ، تۇل جەتىم قالعان ەكەن.
ءتورت جىل كولەمىندە بىرنەشە وتباسىنا بارىپ، ءسىڭىسىپ كورمەك تە بولىپتى. الايدا، ونى اسىراپ العانداردىڭ بارلىعى ناشاقورلار مەن ماسكۇنەمدەر، ۇرى-قارىلار بولىپ شىققان.
«17 جاسقا تولعان شاعىمدا جاڭا ءومىر باستاماق بولىپ، ۇيدەن كەتىپ قالدىم. سومكەمدە كيىمدەردەن بولەك بىرنەشە كىتاپ پەن انامنىڭ سۇيىكتى ءىنجىلى بولدى. بۇل ساپار مەنىڭ ءومىرىمدى تۇبەگەيلى وزگەرتتى» دەيدى ول پرەزيدەنتكە جازعان حاتىندا.
وڭتۇستىك كارولينا شتاتىنداعى بەرەكەلى وتباسىنا مۇشە بولىپ قابىلدانعان گرەيندجەر وسىندا كوللەدجدى ءبىتىرىپ شىعىپ، ۋنيۆەرسيتەتكە ءوز كۇشىمەن تۇسكەن. الايدا، وقۋدىڭ قاراجاتىن تولەۋگە اقشاسى بولماي، وبامادان 10 مىڭ دوللار كومەك سۇرايدى. پرەزيدەنت بولسا بالانىڭ بەتىن قايتارماي، كومەك قولىن سوزعان ەكەن. جانە قولداۋ رەتىندە حات تا جازىپ جىبەرگەن.
«مەنىڭ ساعان بەرەتىن ءبىر-اق اقىلىم بار: وقۋىڭدى جارتى جولدان تاستاماي، سوڭىنا دەيىن ءتامامدا. مەن سەنىمەن ماقتانامىن!» دەلىنگەن وبامانىڭ حاتىندا.
گرەيندجەر جاقىندا اتالعان ۋنيۆەرسيتەتتى ءتامامدايدى. الايدا، سوڭعى وقۋ جىلىنىڭ اقشاسىن جابۋعا تاعى ونىڭ مۇمكىندىگى جوق. سوندىقتان، پرەزيدەنتتىڭ وزىنە جازعان حاتىن ول 9,5 مىڭ دوللارعا ساتىلىمعا شىعارىپ وتىر.
. Baq.kz
