استانادا بوس ورىندار جارمەڭكەسى وتەدى

استانا. قازاقپارات - ەرتەڭ ەلوردانىڭ جۇمىسسىز جۇرگەن تۇرعىندارى كەزەكتى بوس ورىندار جارمەڭكەسىنە قاتىسۋ مۇمكىندىگىنە يە بولادى.

شارا تاڭعى ساعات 11.00-16.00 گە دەيىن استانا قالاسىنىڭ «جاستار» سارايىندا وتەدى.

بۇل تۋرالى astana.kz سايتىنا «بايتەرەك» حالىقارالىق مەديا ورتالىعى حابارلادى.

جارمەنكەدە جۇمىس ىزدەۋشىلەر بىرنەشە جۇمىس بەرۋشىلەرمەن سۇحباتتاسىپ، الەۋمەتتىك قورعاۋ شارالارى تۋرالى اقپاراتقا قول جەتكىزە الادى. ۇيىمداستىرۋشىلار ءۇشىن ءوز بەتىنشە جۇمىسپەن اينالىسىپ جۇرگەن جانە الەۋمەتتىك قورعاۋ مەن قولداۋ جۇيەسىمەن قامتىلماعان ازاماتتاردى تارتۋ ماڭىزدى.

وقۋ ورىندارىنىڭ تۇلەكتەرىنە «جۇمىسپەن قامتۋ 2020 جول كارتاسى» باعدارلاماسى بويىنشا جاستار پراكتيكاسىنان وتۋگە، ال حالىقتىڭ نىسانالى توپتاعى تۇلعالارىنا الەۋمەتتىك جۇمىس ورىندارىنا قىزمەتكە ورنالاسۋعا مۇمكىندىك بار.

سونىمەن قاتار، جارمەڭكەدە جۇمىسپەن قامتۋ ورتالىعىنىڭ ماماندارى قايتا وقىتۋ جانە جاڭا ماماندىق الۋدىڭ مۇمكىندىكتەرى تۋرالى ايتادى. بۇگىنگى كۇنى كەلەسى ماماڭدىقتار بويىنشا كۋرستارعا قابىلداۋ جۇرگىزىلۋدە: تىگىنشى، اسپاز، تاربيەشى، ساتۋشى- كاسسير. ال ماماندىعى جوق تۇلعالار ءۇشىن قىركۇيەك ايىندا باستالاتىن كەلەسى ماماندىقتار بويىنشا كاسىپتىك وقىتۋ باستالادى: كابەلشى، تىگىنشى، كۇتىم بويىنشا كىشى مەيىربيكە.

ەستەرىڭىزگە سالا كەتەيىك، جىل باسىنان بەرى استانادا بىرنەشە بوس ورىندار جارمەڭكەسى وتكىزىلدى. شارا بارىسىندا جۇزدەگەن ەلوردالىق كاسىپورىندار جۇمىسسىز ازاماتتارعا 400 دەن استام بوس ورىن ۇسىندى.