ورازا ايت كۇنى جەتىم بالالار ۇيىنە قايىرىمدىلىق كومەك كورسەتىلدى

ورال. قازاقپارات - قازاقستان مۇسىلماندارى ءدىني باسقارماسى ب ق و بويىنشا وكىلدىگىنىڭ ۇيىمداستىرۋىمەن ورال قالاسىنداعى بالالار ۇيىنە قايىرىمدىلىق كومەك كورسەتىلدى.

ق م د ب-نىڭ ب ق و بويىنشا باسپا ءسوز حاتشىسى نۇرلان سامات ۇلىنىڭ حابارلاعانىنداي، شارادا وبلىس يمامى رۋسلان سۇلتانوۆ ورازا ايت مەرەكەسىمەن قۇتتىقتاپ، جەتىم بالالار ۇيىندە تاربيەلەنىپ جاتقان جەتكىنشەكتەرگە دوستىق، تاتۋلىق، مەيىرىم جايىندا ۋاعىز ايتىپ، كەڭىنەن ءتۇسىندىردى. بالدىرعانداردى قۋانتۋ ماقساتىندا ولارعا تاتتىلەر تاراتىلدى.

ورال قالالىق مەشىتىنىڭ باس يمامى ءالىمحان تۇرلىبەكوۆ قاسيەتتى قۇران-كارىمدى وقىپ، وبلىس يمامى رۋسلان تىنىشتىق ۇلى دۇعا جاسادى.

بۇلدىرشىندەردىڭ قۋانىشتارى قوينىنا سىيماي، اق تىلەكتەرىن ارناپ، وبلىستىق بالالار ءۇيىنىڭ باسشىسى رايسا ناۋرىزوۆا ريزاشىلىعىن ءبىلدىردى.

اۆتور: ەلجان ەرالى