بويجەتكەندى قاعىپ ولتىرگەن جۇرگىزۋشى تولىقتاي اقتالىپ شىقتى
ەستەرىڭىزگە سالايىق، وتكەن جىلدىڭ 12 - جەلتوقسانىندا 21 جاستاعى ازامات BMW X5 كولىگىمەن قاراعاندى مەملەكەتتىك مەديتسينا ۋنيۆەرسيتەتىنىڭ ستۋدەنتىن قاعىپ، وقيعا ورنىنان بوي تاسالاعان بولاتىن.
ال، جابىرلەنۋشى جاڭىلسىن قۇتتىبايەۆا العان دەنە جاراقاتتارىنان وقيعا ورنىندا جان تاپسىرعان ەدى. پوليتسيا وكىلدەرىنىڭ ايتۋىنشا، وقيعا بولعان جەردە بەينەباقىلاۋ كامەرالارى بولماعان.
الايدا، جاقىن ماڭداعى قيىلىسقا ورناتىلعان كامەرا جول تالعامايتىن كولىكتىڭ اسا جوعارى جىلدامدىقپەن جۇيىتكىپ وتكەنىن جازىپ العان. وسىدان بىرنەشە مينۋت وتكەننەن كەيىن قايعىلى جول كولىك وقيعاسى دا ورىن الدى دەيدى ول.
اراعا ەكى ساعات سالىپ ءتارتىپ ساقشىلارى باستى كۇدىكتىنىتىنىڭ كىم ەكەنىن انىقتاپتى. كۇدىكتى ءوز ايىبىن مويىنداعان.
جۇرگىزۋشىنىڭ ايتۋىنشا، مارقۇم بولعان قىز باعدارشامنىڭ قىزىل تۇسىنە وتپەك بولىپ، جولعا ءوزى جۇگىرىپ شىققان كورىنەدى.
جۇرگىزىلگەن تەكسەرۋلەردەن كەيىن ماماندار BMW يەسىنىڭ كىنالى ەمەس ەكەندىگىن انىقتادى. مارقۇم قىز جول ەرەجەسىن ءوزى بۇزعان ەكەن. مۇنى كەيىن سول جەردە بولعان كۋاگەرلەر راستاپتى.
ولاردىڭ ايتۋىنشا، بويجەتكەن جۇرت قاتارلى باعدارشامنىڭ "جاسىل" ءتۇسىن كۇتىپ تۇرعان، كەيىن كەنەتتەن جولعا شىعىپ، كولىكتىڭ استىنا ءوزى تۇسكەن ەكەن.
جابىرلەنۋشى جولدان وتەر كەزدە مۋزىكا تىڭداپ، كولىكتىڭ دىبىسىن ەستىمەي قالعان كورىنەدى. وسى جايتتاردى ەسكەرە وتىرىپ BMW جۇرگىزۋشىسى بارلىق قىلمىستىق جاۋاپكەرشىلىكتەن بوساتىلدى.
