ۆولەيبولدان الەمدىك گران-پري: قازاقستان چەحيادان نەگە ۇتىلىپ قالدى؟
وسىلايشا الەكساندر گۋتوردىڭ شاكىرتتەرى تۋرنيردەگى جاعدايىن ودان سايىن ناشارلاتىپ الدى. ەندى وتانداستارىمىز ءۇشىن فينالدىق ءتۋرنيردىڭ اۋىلى الىستاپ كەتتى. وعان قاتىسۋ ءۇشىن ەندى چەحيادا وتەتىن ءۇش كەزدەسۋدىڭ ۇشەۋىندە دە جەڭىسكە جەتۋ قاجەت.
كەشەگى ويىندا قايتسە دە جەڭىسكە جەتۋدى كوزدەگەن قىزدارىمىز، ويىن باستالىسىمەن ۇپاي سانىمەن العا شىقتى. ونىڭ ۇستىنە قىزدارىمىزدى قولداۋ ءۇشىن بالۋان شولاق اتىنداعى سپورت سارايىنا شامامەن بۇگىن 1500 جۋىق جانكۇيەر جينالدى. وكىنىشكە قاراي، قازاقستان قۇراما كومانداسى ويىندى جاقسى باستاعانىمەن، اياعىنا قاراي ەسە جىبەرىپ الىپ جاتتى. ءبىرىنشى پارتيا چەحيالىقتاردىڭ پايداسىنا شەشىلدى. ەسەپ 16:25
ەكىنشى پارتيا اسا شيەلەنىستى ءوتتى! جانكۇيەرلەردىڭ قىزۋ قولداۋىمەن جىگەرلەنە ويناعان قىزدارىمىز ەسەپتى 20:15 كە جەتكىزدى. ءبىراق، تاعى دا وكىنىشكە قاراي بۇل جولى دا قازاقستاندىقتار پارتيانىڭ سوڭىنا قاراي، جۇيكەلەرى سىر بەرىپ، ورىنسىز قاتەلىكتەرگە بوي الدىرىپ، جەڭىستى قولدان بەردى. ەسەپ 24:26
ءۇشىشى پارتيادا وتانداستارىمىز تاعى دا سىتىلىپ العا شىقتى. ەكى كوماندا دا جان اياماي وينادى. ەسەپ 24:24 جەتكەندە ويىن شارىقتاۋ شەگىنە جەتتى. دەگەنمەن قازاقستاندىقتار سالقىن قاندىلىق تانىتىپ، 27:25 ەسەبىمەن جەڭىستى «جۇلىپ» العانداي بولدى. وسىلايشا، جانكۇيەرلەر ءتورتىنشى پارتيانى كورۋ قۇرمەتىنە يە بولدى.
ءتورتىنشى پارتيادا ويىن تەڭبە-تەڭ دارەجەدە جالعاستى. ءبىراق كوپ ۇزاماي چەحيالىقتار ءا دەگەننەن جەتى ۇپايمەن سىتىلىپ العا شىعىپ كەتتى. دەگەنمەن قىزدارىمىز دا ايانىپ قالمادى. ويىندى تەڭەستىرۋگە بار كۇشتەرىن سالدى. ءبىراق چەحيالىقتار بارىنشا ۇقىپتى ويناۋعا تىرىسىپ، ويىن تىزگىنىن قولدان شىعارمادى. ەسەپ 16:25.
وسىلايشا قازاقستان قۇراما كومانداسى الەمدىك گران-پري ويىندارىنىڭ الماتىلىق كەزەڭىندە بارلىعى ءۇش كەزدەسۋ وتكىزىپ، بىرەۋىندە جەڭىسكە جەتىپ، ەكەۋىندە جەڭىلىستىڭ اشى ءدامىن تاتتى. ەندى قىزدارىمىز 3 ۇپايمەن الەمدىك گران-پري-ءدىڭ 1-3- تامىز ارالىعىندا چەحيادا وتەتىن ەكىنشى كەزەڭىنە قاتىسادى.
فينالدىق تۋرنير 15-17- تامىز ارالىعىندا بولگاريادا وتەدى.
تۋرنير جەڭىمپازى ەكىنشى ديۆيزيوننىڭ قۇرامىنا وتەدى.
اۆتور: جاپپاربەرگەن ايبوتا
