گەنناديي گولوۆكين: مەن ەندى ميگەل كوتتومەن جۇدىرىقتاسقىم كەلەدى
گەنناديي گولوۆكين وسى كەزدەسۋدەن كەيىن ىلە-شالا امەريكالىق تەلەارنالاردىڭ بىرىنە بەرگەن سۇحباتىندا تەز جەڭىسكە جەتكەنىنە قاراماستان دانيەل گيلگە سىيلاستىقپەن قارايتىندىعىن ءمالىم ەتتى، دەپ حابارلايدى sports.kz پورتالى. سونىمەن قاتار، وسى سۇحبات بارىسىندا قازاقستاندىق بوكسشى ەندى الداعى ۋاقىتتا ناقتى قاي بوكسشىمەن قولعاپ تۇيىستىرگىسى كەلەتىندىگىن اشىق مالىمدەدى.
- گەننادي، كاسىبي رينگتەگى وتىزىنشى جەڭىسىڭىز قۇتتى بولسىن! بۇدان باسقا ءسىز، وسىمەن 27- كەزدەسۋىڭىزدى نوكاۋتپەن جەڭدىڭىز. جالپى، وسى نوكاۋت ءسىز ءۇشىن قانداي مانگە يە؟ ءسىز ءۇشىن نوكاۋتپەن جەڭۋ ماڭىزدى بولدى ما؟
- قۇتتىقتاعانىڭىزعا راحمەت! ارينە، جەڭىسكە جەتكەنىمە ءسوز جوق قۋانىشتىمىن. جەڭىسىممەن قاتار بۇل نوكاۋت تا مەن ءۇشىن وتە ماڭىزدى. ول مەنىڭ كوماندام ءۇشىن، جانكۇيەرلەرىم ءۇشىن، وتانىم ءۇشىن دە ماڭىزدى. بۇل - مەن ارمان ەتكەن ەلەۋلى جەتىستىك. سول ءۇشىن وعان قول جەتكىزگەنىمە وتە قۋانىشتىمىن!
- جەكپە-جەك بارىسىندا سىزگە بالانىڭ قولىنان كامپيتىن تارتىپ الۋ قيىنىراق بولاتىن سياقتى بولىپ كورىندى...
- ولاي تىم كەسىپ-ءپىشىپ ايتپايىقشى، وتىنەم! دانيەل گيل - تاماشا بوكسەر جانە سپورتشى. مەن ونى بوكستاعى جەتكەن جەتىستىكتەرى ءۇشىن قاتتى سىيلايمىن. وسى كەزدەسۋدە بولعان جاعداي ونى ءبۇيتىپ قورلاۋعا نەمەسە بىلىكتىلگىنە، شەبەرلىگىنە كۇمان كەلتىرۋگە نەگىز بولا المايدى!
- وسى كەزدەسۋدە ءسىز قانداي دا ءبىر ارنايى ستراتەگيالىق جوسپار ازىرلەپ پە ەدىڭىز؟ ستيلىڭىزگە قانداي دا ءبىر وزگەرتۋلەر ەنگىزدىڭىز بە؟
- ماعان وزگەرتۋ ەنگىزۋدىڭ قاجەتى جوق. مەن رينگكە ءوز ستيلىمدە شىعىپ جۇدىرىقتاسامىن. تەك ءوز ءستيلىمدى ۇستانۋعا تىرىسامىن. بۇل، مىنەكي، ءوز جەمىسىن بەرىپ جاتىر. مەن قاشاندا ءوز ستيلىمدە بوكستاسىپ كەلەمىن، بۇدان كەيىن دە وسىلاي بوكستاسا بەرمەكپىن. سوندىقتان وزگەرتۋ ەنگىزۋدىڭ ەشقانداي قاجەتى جوق.
- ءسىز ءوز ءستيلىڭىزدى قالاي سيپاتتار ەدىڭىز؟
- مەكسيكالىق شىعار دەپ ويلايمىن. ماعان اگرەسسيالىق، شابۋىلدىق سيپاتتا جۇدىرىقتاسقان ۇنايدى. ايىزىم قانىپ جۇدىرىقتاسامىن. مەن بۇدان راحات الامىن.
- «مەديسون سكۆەر گاردەن» ارەناسىنداعى دەبيۋتىڭىز ۇنادى ما؟
- ماعان بارلىعى ۇنادى. ءوزىمنىڭ كەزەكتى جەكپە-جەگىمدى وسى جەردە وتكىزگەنىمە توبەم كوككە جەتكەندەي قۋانىشتىمىن. وسى ءساتتى پايدالانىپ، بۇگىنگى كەزدەسۋدى كورۋگە كەلگەن بارلىق كورەرمەندەرگە ريزاشىلىعىمدى بىلدىرگىم كەلەدى! بۇگىنگى جەكپە-جەكتە ولارعا ۇنادى دەگەن ۇمىتتەمىن. مەن قاشاندا كورەرمەن ءۇشىن جۇدىرىقتاسامىن جانە سوندىقتان ولارعا ادەمى جانە قاشاندا قىزىقتى، شيەلەنىستى بوكس سىيلاۋعا تىرىسامىن!
- كەلەسى قارسىلاسىڭىزدىڭ كىم بولعانىن قالار ەدىڭىز؟
- مەنىڭ ديۆيزيونىمدا ءالى دە مىقتى بوكسشىلار كوپ. ولار مەنىڭ تەلەفون ءنومىرىمدى بىلەدى. ونى ولاردىڭ اگەنتتەرى دە بىلەدى. مەنىڭ بايلانىس ءنومىرىم تەلەارناشىلارعا دا بەلگىلى. ەگەر العاشقىلارى مەنەن قورىقپايتىن بولسا، ال ەكىنشىلەرى تاعى ءبىر قىزىقتى كورسەتىلىمدى كورگىلەرى كەلسە، وندا حابارلاسسىن، قاتەلەسپەيدى.
- سوندا دا بولسا، فاميلياسىن اتاڭىزشى! ءسىز جاۋاپتان تايقىپ جاتىرسىز. سۇراقتى توتەسىنەن قويايىنشى: گەنناديي گولۆوكين ەندى كىممەن جۇدىرىقتاسقىسى كەلەدى؟
- مەن بۇدان كەيىن دە بىرىكتىرۋشى جەكپە-جەكتەردى قالايتىنىمدى تاعى دا ايتقىم كەلەدى. ءبىز وسى سالماقتا تەك وسىلايشا ەڭ مىقتى بوكسشىنى انىقتاي الامىز. ال ونىڭ كىم بولاتىنى - ول باسقا اڭگىمە. مەن پيتەر كۋيللين جانە ميگەل كوتتو سەكىلدى بوكسشىلاردى اتاي الامىن.
- ەگەر دە تاڭداۋ تەك ءسىزدىڭ قولىڭىزدا بولسا، وندا كىمدى تاڭدار ەدىڭىز؟
- ميگەل كوتتونى. مەنىڭشە، بۇل كورەرمەندەر ءۇشىن دە، تەلەارنالار ءۇشىن دە كەرەمەت كەزدەسۋ بولار ەدى. ال بىزگە ءوزارا جۇدىرىقتاسۋ ءارى ارامىزدان ەڭ ۇزدىك بوكسشىنى انىقتاۋ قىزىقتى بولار ەدى.
اۆتور: جاپپاربەرگەن ايبوتا
