ەلباسى: ورازا ايت بارلىق وتانداستارىمىزدىڭ بىرلىگىن ارتتىراتىن مەرەكە
***
قىمباتتى وتانداستار!
سىزدەردى ورازا ايت مەرەكەسىنىڭ باستالۋىمەن شىن جۇرەكتەن قۇتتىقتايمىن!
بۇل مەيرام الەمنىڭ بارشا مۇسىلماندارى رۋحاني تازارۋعا ۇمتىلاتىن رامازان ايىنىڭ اياقتالعانىن بىلدىرەدى. وسى كەزەڭدە قايىرىمدى ىستەر اتقارىپ، ءبىزدىڭ كومەگىمىز بەن جاناشىرلىعىمىزعا ءزارۋ جاندارعا قامقورلىق كورسەتۋگە دەگەن ىزگى نيەت پەن ىقىلاس ارتا تۇسەدى.
يسلام ادامزات بالاسىن تاتۋلىققا، تىنىشتىق پەن تۇراقتىلىققا ۇندەيدى. وسىناۋ بيىك قۇندىلىقتار تەك مۇسىلمان قاۋىمىن عانا ەمەس، بۇكىل قازاقستان حالقىن دا ۇيىستىرا تۇسەدى. سوندىقتان ورازا ايت بارلىق وتانداستارىمىزدىڭ بىرلىگىن ارتتىراتىن مەرەكە بولىپ سانالادى.
قازاقستان قوعامى ءوزىنىڭ باي رۋحاني مۇراسىن، ءوزارا سىيلاستىق پەن كەلىسىمگە نەگىزدەلگەن ىرگەسى بەرىك قارىم-قاتىناستارىن ورىندى ماقتان تۇتادى.
بارشا قازاقستاندىقتاردى وسى داستۇرلەردى بارىنشا نىعايتىپ، جاسامپاز قۇندىلىقتارىمىزدى ءاردايىم قاستەرلەۋگە شاقىرامىن.
قاسيەتتى ورازا ايت حالقىمىزعا رۋحاني سەرپىلىس، شاڭىراقتارىڭىزعا باق-بەرەكە اكەلسىن!
