ورازا ايت - مەيىرىمدىلىكتىڭ، بىرلىكتىڭ، قايىرىمدىلىق پەن شاتتىقتىڭ مەرەكەسى - باس ءمۇفتي ەرجان قاجى مالعاجى ۇلى
قۇرمەتتى باۋىرلار!
ورازا ايت مەرەكەسىنە امان-ەسەن جەتكىزگەن اللا تاعالاعا سانسىز شۇكىرلەر مەن ماداقتار بولسىن. بارشا وتانداستارىمدى مۇسىلمان قاۋىمىنىڭ ۇلىق، قاستەرلى مەرەكەسى - ورازا ايت مەيرامىنىڭ باستالۋىمەن قۇتتىقتايمىن. ايت مۇباراك بولسىن!
قاسيەتتى رامازان ايىنىڭ اياقتالعانىن بىلدىرەتىن ورازا ايت - مەيىرىمدىلىكتىڭ، يگىلىكتىڭ، بىرلىكتىڭ، ىزەتتىلىكتىڭ، قايىرىمدىلىقتىڭ، دوستىق پەن شاتتىقتىڭ مەرەكەسى. ورازا ايت ۇلتتار مەن ۇلىستاردى ىنتىماققا ۇيىستىرادى. يماندى كۇشەيتىپ، كەڭپەيىل، باۋىرمال، قوناقجاي حالقىمىزدى جاقسىلىققا، قايىرلى ءىس جاساۋعا جەتەلەيدى.
30 كۇن ورازادا حالقىمىز ىجداھاتتىلىقپەن اۋىز بەكىتتى. مەشىتتەرىمىزدە اۋىزاشارلار مەن قايىرىمدىلىق ءىس-شارالار ۇيىمداستىرىلىپ، تۇرمىس جاعدايى تومەن وتباسىلارىنا كومەك كورسەتىلدى. ەل يگىلىگى ءۇشىن قىزمەت ەتىپ جۇرگەن كوپتەگەن ازاماتتار جاقسىلىققا ۇلەس قوسىپ، ساۋابى مول امالدارعا ات سالىستى. بارشاسىنا «اللا رازى بولسىن» دەگىم كەلەدى.
«ايت» ءسوزى «قارىمتا» دەگەن ماعىنانى بىلدىرەدى. جاراتۋشى يەمىز ءاربىر ىزگى امال مەن يگىلىكتى ءىستىڭ ساۋابىن بەرىپ، مەيىرىم-شاپاعاتىن توگەدى.
ايت كۇنىندە عۇسىل قۇيىنىپ، جۇپار ءيىس سەبىنىپ، جاماعاتپەن ايت نامازىنا قاتىسۋدىڭ ساۋابى مول. تۋعان-تۋىستاردى، كورشىلەردى، دوس-جاراندى مەرەكەمەن قۇتتىقتاپ، داستارحان جايىپ، ۇلىق مەيرامنىڭ ءسانى مەن سالتاناتىن ارتتىرۋ - ورازا ايتتىڭ وزىنە ءتان جاراسىمدى ءھام ساۋاپتى امالدارىنان. وسى مەرەكەدە ءوزارا رەنجىسكەن كىسىلەردى تاتۋلاستىرساق، وزگەنىڭ قاتە-كەمشىلىگىن كەشىرىپ، اتا-انامىزدىڭ قۇرمەتى مەن ريزالىعىنا بولەنسەك، ول دا - مۇسىلمانعا ءتان سيپات. يسلامدا ءاربىر ىزگى امال - ساداقا. كورشىگە كومەكتەسۋ، مۇقتاجعا قول ۇشىن بەرۋ، ءتىپتى جەتىمنىڭ باسىن سيپاپ، وزگەلەرگە جىلى شىراي تانىتۋ، ول دا - ساداقا.
كۇندەگى ورازاسىن قۇرمامەن اشۋدى سۇننەت ەتكەن پايعامبارىمىز (س. ع. س) ايت نامازىنا باراردا الدىمەن قۇرمادان ءدام تاتىپ بارىپ ۇيىنەن شىققاندى ۇناتاتىن.
ورازا ايتتا وتباسىمىزدى شاتتىققا بولەپ، اعايىنعا سىيلىق بەرۋدىڭ دە ماڭىزى زور.
اللا تاعالا ۇستاعان ورازالارىمىزدى، دۇعا-تىلەكتەرىمىزدى قابىل ەتكەي! حالقىمىزدىڭ بىرلىگى مەن ىنتىماعى ارتىپ، تاۋەلسىزدىگىمىزدىڭ تۇعىرى بيىك، ەگەمەندىگىمىز ماڭگى باياندى بولعاي! ءامين!، - دەلىنگەن باس ءمۇفتيدىڭ قۇتتىقتاۋىندا.
