مەملەكەت باسشىسى ۆينچەنتسو ءنيباليدى «تۋر دە فرانس» جارىسىنداعى جەڭىسىمەن قۇتتىقتادى

استانا. قازاقپارات - ەلباسى نۇرسۇلتان نازاربايەۆ «تۋر دە فرانس» كوپكۇندىك جارىسىنداعى جەڭىسكە وراي «استانا» ۆەلوكومانداسىنىڭ كاپيتانى ۆينچەنتسو نيباليگە قۇتتىقتاۋ جەدەلحاتىن جولدادى.

بۇل تۋرالى اقوردانىڭ باسپا ءسوز قىزمەتىنەن حابارلادى.

قازاقستان پرەزيدەنتى الەمنىڭ ۇزدىك كاسىپقوي ۆەلوشاباندوزدارىنىڭ باسەكەسىنە قازاقستاندىقتار ءبىر اي بويى كۋا بولعانىن ايتتى.

«ءسىزدىڭ ەڭبەگىڭىز بەن جەڭىسكە دەگەن جىگەرىڭىز بارلىق كەزەڭدە ءبىزدىڭ ۆەلوكومانداعا قازاقستاننىڭ سپورتتىق جەتىستىكتەرىن تاعى دا تانىتۋعا مۇمكىندىك بەردى»، - دەلىنگەن جەدەلحاتتا.

مەملەكەت باسشىسى سپورتشىعا جانە بۇكىل «استانا» كومانداسىنا ۆەلوسپورتتىڭ باستى جارىستارىندا توپ جارۋ جولىنداعى جەمىستى ەڭبەك پەن جانكەشتى كۇرەس ءۇشىن ريزاشىلىق ءبىلدىردى.

نۇرسۇلتان نازاربايەۆ ۆينچەنتسو نيباليگە مىقتى دەنساۋلىق، باق-بەرەكە، جاڭا جەڭىستەر مەن سپورتتىق جەتىستىكتەر تىلەدى.