تۆيتتەردەگى جازباسى ءۇشىن جولاۋشىنى ۇشاققا كىرگىزبەدى
دافف ۋوتسون بالالارىمەن بىرگە Southwest Airlines كومپانياسىنىڭ اۋە رەيسىمەن دەنۆەردەن ميننەاپوليسكە ۇشپاق بولعان. جولاۋشى قىزمەت كورسەتكەن كەزدە ارتىقشىلىق بەرەتىن "A-list" ارنايى باعدارلاماسىنىڭ قاتىسۋشىسى بولعان.
ونىڭ بالالارى باسىم قىزمەت كورسەتەتىن پاراققا ەنگىزىلمەگەنىنە قاراماستان، بۇدان بۇرىن وتباسىندا قولايسىز جاعداي تۋىنداماعان. الايدا بۇل جولى ۇشاققا بۇرىن كىرۋگە رۇقسات بەرمەدى. ۋوتسون ءوز تۆيتتەرىندە ورەسكەل قىزمەت كورسەتكەنى ءۇشىن دەرەۋ شاعىمداندى، اشۋعا بۋلىققان ول اۋە كومپانياسىنىڭ اتاۋىن، قىزمەتكەردىڭ اتى-ءجونىن كورسەتىپ، «قىزمەتكەرى دورەكى» دەپ ايىپتادى.
سودان كەيىن دافف بالالارىمەن بورتقا كوتەرىلگەن ساتتە ونىڭ اتى-ءجونىن داۋىستى بايلانىسپەن اتاپ، ۇشاقتان ءتۇسۋىن تالاپ ەتتى. بورت جولسەرىگى تۆيتتە جازىلعان جاعداي تۋرالى مالىمدەدى.
"ءسىز حابارلامانى ءوشىرىڭىز، بولماسا پوليتسيا شاقىرامىن"، - دەدى ول.
اۋە كومپانياسى بولعان جاعداي تۋرالى اقپاراتتى راستادى جانە وعان جەڭىلدىك بەرىپ، زالالدىڭ ورنىن ەلۋ دوللارمەن تولتىرۋعا تىرىستى. ءبىراق دافف پەن ونىڭ وتباسى ەندى بۇلاردىڭ ا قىزمەتىن پايدالانبايتىن بولىپ شەشتى.
«مەن ءوز قاۋىپسىزدىگىمدى قورعاي الامىن، تەك بالالارىم مۇنداي جاعدايعا قالعانىن قالامايمىن»، - دەدى ول.
