مەككەگە جاياۋ شىققان مارافونشى مۇنايلى القاپقا جەتتى

استانا. قازاقپارات-  ەل وردادان جولعا شىعىپ، مەككەنى بەتكە العان دۋلات يمانقاجى اتىراۋعا تابان تىرەدى. قازاق ەلىنىڭ استاناسىنان جەتى مىڭ شاقىرىم قاشىقتىقتاعى مەككەگە دەيىن جۇگىرىپ بارىپ، كىشى قاجىلىعىن وتەپ كەلۋگە نيەتتەنگەن ازاماتتىڭ اپتاپ ىستىققا قاراماستان اياق الىسى ءتاۋىر.

تىنباستان جۇگىرىپ كەلە جاتقانىنا بۇگىن 20 تاۋلىك بولدى.

جالپى «استانا-مەككە» بەيبىتشىلىك مارافونىنا ءۇش ايداي ۋاقىت كەتەدى ەكەن. ايتا كەتۋ كەرەك مارافون سپورتىنىڭ تاريحىندا جەر بەتىندەگى ەڭ مىقتى دەگەندەردىڭ ءوزى ون كۇننەن ارتىق جولدا بولماعان. سوندىقتان دۋلات يمانقاجىنىڭ باستاماسى ناعىز ەرلىك رەتىندە تىركەلمەك.

كۇنىنە ءجۇز شاقىرىمعا دەيىن جۇگىرەتىن دۋلات يمانقاجى ساپارىن ماڭعىستاۋ وبلىسىنا قاراي بۇردى. ودان ارى كاسپيي تەڭىزى ارقىلى ءازىربايجان ەلىنىڭ شەكاراسىنا وتەدى. قازاقتىڭ جەلاياعى شامامەن قىركۇيەك ايىنىڭ ون بەسىندە مەككەگە جەتۋدى جوسپارلاپ وتىر.

دۋلات يمانقاجى، مارافونشى:

- ەندى اقتاۋعا بارىپ، ارى قاراي باكۋ. ءازىربايجاننان كەيىن يراننان كۋۆەيت، ودان كەيىن ساۋد ارابياسى. تانىمايتىن جەر بولعاسىن، ءبىر جاعىنان جۇرەكسىنەسىڭ، ءبىراق ەندى ءوز نيەتىم، جەتەمىن دەپ ويلايمىن. ويتكەنى ءبىر اللاعا سەنەمىن ءبىرىنشى، وزىمە سەنەمىن ودان كەيىن.

khabar.kz