باسقالاردان ءدىني، يماندى اندەردى ايتۋمەن ەرەكشەلەنەمىن - سەرجانالى الىبەك، ءانشى، سازگەر

استانا. قازاقپارات - قازاق ەستراداسىندا وزىندىك ورنى بار، سەزىمگە تولى اندەرىمەن تىڭدارمان جۇرەگىنە جول تاۋىپ جۇرگەن ءانشى العاش ساحناعا «عاشىق جۇرەك» انىمەن شىقتى.

«مونشاقتىم»، «ساعىنتپا مەنى»، «كورمەسەم بولماس» جانە ءبىرقاتار ءدىني اندەرىمەن تىڭدارماندار جۇرەگىن جاۋلاپ العان سەرجانالى الىبەك بىلتىرعى جىلى ساحنادا جۇرۋىنە بەس جىل تولۋىنا وراي الماتى قالاسىندا ەسەپ بەرۋ كونسەرتىن وتكىزگەن بولاتىن. وسىعان بايلانىس «الاش ايناسى» گازەتىنىڭ ءتىلشىسى ۇلكەن ساحنادا جۇرگەنىنە بيىل التى جىل تولعان ونەرپازبەن سۇقباتقا تارتقان ەدى.

- جەكە شىعارماشىلىعىڭىزدا قانداي جاڭالىقتار بار؟

- مەن ءۇشىن 2013 - جىل ەرەكشە بولدى. كوپتەن ارمانداعان جەكە شىعارماشىلىق كەشىمدى 29- قاراشادا رەسپۋبليكا سارايىندا وتكىزدىم. كەش «مونشاقتىم» دەپ اتالدى. ساحنا وتە جوعارى دارەجەدە بەزەندىرىلدى. اندەر مۋزىكالىق اسپاپتاردىڭ سۇيەمەلدەۋىمەن ورىندالدى. ليريكالىق، كلاسسيكالىق، ءدىني جەكە اندەرىممەن قاتار، قوناقتا بولعان انشىلەرمەن دۋەت بوپ جازعان اندەر دە شىرقالدى.

- حالىقتىڭ كوڭىلىنەن شىقتى دەپ ويلايسىز با؟

- كەشتىڭ حالىقتىڭ كوڭىلىنەن شىقپاۋى مۇمكىن ەمەس. ويتكەنى بارلىق كۇش جىگەرىمدى، قايراتىمدى، كۇنىمدى-ءتۇنىمدى وسى كەشكە ارنادىم. حالىق زالعا لىق تولدى. شۇكىر.

- قازىر رەپەرتۋارىڭىزدا كوبىنە ءدىني اندەر... تىڭدارماندارىڭىز قالاي قابىلداپ جاتىر؟

- رەپەرتۋارىمدا تەك ءدىني اندەر ەمەس، بارلىق جانرداعى اندەر بار. ءبىراق ءدىني اندەرگە ەلدىڭ ىقىلاسى تىپتەن ەرەكشە.

- وسى جانردا ءان ورىنداۋىڭىزعا نە تۇرتكى بولدى؟

- ستامبۋلدا قوجا احمەت ياسساۋي مەدرەسەسىندە وقىدىم. سول ستۋدەنتتىك كەزدەردە ءدىني تاقىرىپتا اندەردى كوپ ورىندادىم. وزىمە ۇنايدى، جانىم دا راحات تابادى ونداي اندەر ورىنداعاندا.

- جاقىندا تەلەارنالاردىڭ بىرىندە «كىم ەدىڭ؟» ءانىنىڭ ءسوزى سىنعا ۇشىرادى. ءاندى تاڭداعاندا سوزىنە ءمان بەرەسىز بە؟

- ءيا، سىنعا ۇشىراعانىن ەستىدىم. ءبىراق سونى سىناپ وتىرعان ادامنىڭ ءوزى سونداي كەرەمەت ءسوز جازا الادى ما ەكەن؟ قازاقتا «بىتكەن ىسكە، سىنشى كوپ» دەگەن ءسوز بار.

- ونەر سالاسىنا جاڭالىق اكەلدىم دەپ ويلايسىز با؟

- اسا ءبىر جاڭالىق اكەلدىم دەپ ويلامايمىن. ءبىراق ءدىني، يماندىلىق اندەرىممەن ەرەكشەلەنەتىن شىعارمىن مۇمكىن...

- قازىرگى قازاق ەستراداسىنداعى انشىلەر ءبىر-بىرىنە قاتتى ۇقسايدى. اندەرى جىلاڭقى دەگەن پىكىرلەر بار حالىق اراسىندا. وسى تۇرعىدا قانداي وي ايتا الاسىز؟ ءسىزدىڭ ەرەكشەلىگىڭىز قانداي؟

- جىلاڭقى دەپ ايتۋعا كەلىسپەيمىن. ويتكەنى قازاقتىڭ مىنەزى سونداي. ءبىزدىڭ مەنتاليتەت اشىق-شاشىق، قىبىر-جىبىرعا كەلمەيدى. حالىق تا ۇناتا بەرمەيدى وندايدى. سوندىقتان بولار ءبىزدىڭ انشىلەردە بايسالدى، ماعىنالى اندەر كوپ. وزىمە كەلسەم، ومىردە قاندايمىن، ساحنادا دا ءوزىمدى سولاي ۇستايمىن. ەشقانداي ەرەكشەلىك جوق.

- ХХІ عاسىردىڭ ونەرىندە ءسىز مويىندايتىن تۇلعا؟

- قازىرگى عاسىردا مەن مويىندايتىن ونەر ادامى -  ماقپال ءجۇنىسوۆا. ونەرگە ناعىز بەرىلگەن تالانتتى ادام.

- ماقپال، روزا اپايلارىمىزدىڭ، ەسكەندىر، نۇرعالي اعالارىمىزدىڭ اندەرىن بارشا قازاق ەلى، ءتىپتى شەتەلدەردە دە تىڭدايدى. اندەرى ماڭگىلىك ەل ەسىندە. ءسىزدىڭ اندەرىڭىز ومىرشەڭ بولادى دەپ ويلايسىز با؟

-  بۇل كىسىلەر شىنىندا ونەرگە ەڭبەگى سىڭگەن جاندار عوي. اللا بۇيىرتسا وسى اعا-اپالاردىڭ جولدارىن بەرسىن دەيمىز.

- قوعامداعى ءسىزدى ويلاندىراتىن ماڭىزدى ماسەلە قانداي؟

- قازىرگى كەزدە مەنى قاتتى ويلاندىراتىن ماسەلە - ادامدار اراسىنداعى باۋىرمالدىق، مەيىرىمدىلىك، ادامگەرشىلىك قاسيەتتەردىڭ ازايىپ بارا جاتقاندىعى. قازاقيلىعىمىزدى جوعالتپاۋعا تىرىسساق ەكەن.

- الداعى جوسپارلارىڭىزبەن بولىسە وتىرساڭىز...

- الداعى جوسپارىم - وبلىستاردا جەكە شىعارماشىلىق كەشتەرىمدى امان-ەسەن ابىرويمەن وتكىزىپ الۋ. جاڭا اندەر جازىلىپ جاتىر. جاڭا البوم، بۇيىرتسا، جاقىن كۇندەرى تىڭدارمان قولىنا ءتيىپ قالار.

- سۇقبات بەرگەنىڭىز ءۇشىن العىسىم شەكسىز..

اۆتور: لاريسا ماقسات

«الاش ايناسى»