تۆيتتەردە جاريالاعان ءسوزى ءۇشىن ۇشاقتان شىعارىپ جىبەرگەن
وقيعا كولورادو شتاتىنىڭ دەنۆەرا اۋەجايىندا ورىن العان. ەكى كىشكەنتاي قىزىمەن ساپارعا اتتانعان ەر ادام بورتقا كەزەكسىز كوتەرىلمەك بولعان. ونى ۇشاق قىزمەتشىسى كەزەكسىز جىبەرۋدەن باس تارتقان. وسى تۇستا ەكەۋى سوزگە كەلىپ قالعان. بىرەر ساتتەن سوڭ ۇشاققا جايعاسىپ بولعان جولاۋشى اتى-ءجونىن اتاپ، دەنۆەراداعى ەڭ دورەكى قىزمەتشى دەگەن ماعىنادا Twitter- دە پوست جاريالاعان.
سودان كوپ ۋاقىت وتپەستەن جولاۋشىنى ۇشاقتان شىعارىپ جىبەرگەن. ەكى قىزىن جەتەكتەپ بورتتان شىققان ساتتە الگىندە سوزبەن ىلىگىسىپ قالعان قىزمەتشى ونىڭ دەرەۋ Twitter- دە جاريالاعان ءسوزىن ءوشىرۋىن تالاپ ەتكەن. ويتپەسە ونى قاۋىپتى ادام دەپ ايىپتاپ، ساقشىلاردى شاقىراتىنىن حابارلاعان. جولاۋشى ونىڭ تالاپتارىن ورىنداعان سوڭ بورتقا قايتا ورالىپتى.
كەيىنىرەك امەريكالىق ازامات اۋەكومپانياسى وعان 50 دوللارلىق ۆاۋچەر ۇسىنىپ، وقيعانىڭ ارتىن جۋىپ-شايماق بولعان. ءبىراق ول ەندى بۇل اۋەكومپانياسىنىڭ قىزمەتىنە جۇگىنبەك ەمەس.
