تەمەكى تۇقىلىن لاقتىرعانى ءۇشىن سەگىز تاۋلىككە قامالدى

كوكشەتاۋ. قازاقپارات - قورعالجىن اۋدانىنىڭ تۇرعىنى تەمەكى تۇقىلىن قوعامدىق ورىندا لاقتىرعانى ءۇشىن سەگىز تاۋلىك مەرزىمگە اكىمشىلىك قاماۋ جازاسىنا كەسىلدى.

بۇل تۋرالى وبلىستىق سوتتىڭ باسپا ءسوز حاتشىسى ايسۇلۋ قۇلمانبەتوۆا ءمالىم ەتتى.

ا. قۇلمانبەتوۆانىڭ ايتۋىنشا، قورعالجىن اۋدانىنىڭ سابىندى اۋىلدىق وكرۋگى اكىمدىگى عيماراتىنىڭ الدىندا اۋىل تۇرعىنى ازامات ا. ءوزى شەككەن تەمەكى تۇقىلىن لاقتىرىپ، قوعامدىق ورىندى لاستاعان. ءسويتىپ، تەمەكى تۇقىلى تاستالعان جەرگە ۋچاسكەلىك پوليتسيا ينسپەكتورى كەلىپ اكىمشىلىك قۇقىق بۇزۋشىلىق تۋرالى حاتتاما تولتىرعان. ۋچاسكەلىك ينسپەكتور ءوز كەزەگىندە قۇقىق بۇزۋشىعا بۇل جاساعان ۇساق بۇزاقىلىعىنىڭ سوڭىنىڭ نەمەن اياقتالاتىنىن ءتۇسىندىرىپ، ياعني لاقتىرعان تەمەكى تۇقىلى ءۇشىن مەملەكەت پايداسىنا ۇشتەن ونعا دەيىنگى ايلىق ەسەپتىك كورسەتكىش مولشەرىندە ايىپپۇل تولەيتىنىن نەمەسە 10 تاۋلىككە دەيىن قاماۋعا الىناتىنى جونىندە تۇسىندىرگەن.

سوتتا قۇقىق بۇزۋشى كىناسىن تولىق مويىنداپ، ىستەگەن ىسىنە وكىنەتىندىگىن جانە الداعى ۋاقىتتا قوعامدىق ورىنداردى لاستاماۋ تۋرالى ۋادەسىن بەردى.

سوت قاۋلىسى بويىنشا ازامات ا. 8 تاۋلىك مەرزىمگە اكىمشىلىك قاماۋ جازاسىنا كەسىلدى.

اۆتور: اسلان وسپانوۆ