قازاقستاندا كاسىپكەرلىك كودەكسى ازىرلەنەدى

استانا. قازاقپارات - بۇگىن ادىلەت ءمينيسترى بەرىك يماشەۆتىڭ توراعالىعىمەن ۆەدومستۆونىڭ القا ءماجىلىسى ءوتىپ، وندا اعىمداعى جىلعى ءبىرىنشى جارتىجىلدىقتا اتقارىلعان جۇمىستار قورىتىندىلاندى. بۇل تۋرالى مينيسترلىكتىڭ باسپا ءسوز قىزمەتىنەن حابارلاندى.

القا وتىرىسىنا بەينە بايلانىس ارقىلى وبلىستىق ادىلەت دەپارتامەنتىنىڭ باسشىلارى، جىلجىمايتىن مۇلىك جونىندەگى ورتالىق ديرەكتورلارى، ادۆوكاتتار، نوتاريۋستار مەن جەكە سوت ورىنداۋشىلارىنىڭ وڭىرلىك قاۋىمداستىق وكىلدەرى قاتىستى. جيىن بارىسىندا مينيستر بەرىك يماشەۆ ەسەپتى كەزەڭدە زاڭ جوبالاۋ جۇمىستارىنىڭ 100 پايىزعا اتقارىلعانىن، سونىمەن قاتار، اكىمشىلىك قۇقىق بۇزۋشىلىق تۋرالى كودەكستى ازىرلەۋدە ۇلكەن اۋقىمداعى جۇمىستار اتقارىلعانىن اتاپ ءوتتى.

«جاڭا رەداكسياداعى كودەكس بويىنشا كەلەسى جىلدان باستاپ ادىلەت اۋماقتىق بولىمشەلەرى زياتكەرلىك مەنشىك، مۇلىككە قۇقىقتى مەملەكەتتىك تىركەۋ سالالارى بويىنشا اكىمشىلىك ىستەردى قاراپ، ولار بويىنشا ءىس قوزعاۋعا وكىلەتتى بولادى. وسىعان وراي، ادىلەت اۋماقتىق ورگاندارى كودەكستەگى جاڭالىقتاردى بەلسەندى تۇردە جۇرتشىلىققا تۇسىندىرۋلەرى كەرەك. ايلا-شارعىعا ءتۇسىپ قالماس ءۇشىن ازاماتتار وزدەرىنىڭ قۇقىق پەن مىندەتتەرىن انىق بىلۋلەرى كەرەك»، - دەپ اتاپ ءوتتى مينيستر ب. يماشەۆ.

بۇدان بولەك، ۆەدومستۆو باسشىسى الداعى ۋاقىتتا قازاقستاندا العاش رەت كاسىپكەرلىك ماسەلەلەرى بويىنشا كوديفيكاتسيالانعان اكتىلەر ەنگىزىلەتىنىن ايتتى. وسىعان بايلانىستى، مينيستر كاسىپكەرلىك كودەكس جوباسىن ۇكىمەت پەن پارلامەنتكە ۋاقىتىندا ەنگىزۋدى قامتاماسىز ەتۋ قاجەتتىگىن اتاپ ءوتتى.

«ەلىمىزدىڭ ۇستانعان ساياساتىنا سايكەس، ادىلەت ورگاندارى باسشىلارى مەن قىزمەتكەرلەرى ءۇشىن ەڭ باستى باسىمدىق ازاماتتاردىڭ قۇقىقتارى مەن بوستاندىقتارىن قورعاۋ بولۋى ءتيىس. مينيسترلىكتىڭ تۇتاستاي قىزمەتى وسىنداي تۇرعىدا جوسپارلانىپ ءارى باعالانۋى ءتيىس»، - دەدى مينيستر ب. يماشيەۆ.

اۆتور: قانات مامەتقازى ۇلى