اقمولا پوليتسەيلەرى جارتى جىل بۇرىن جاسالعان قىلمىستىڭ بەتىن اشتى
پوليتسەيلەردىڭ مالىمەتى بويىنشا، بۇگىنگى كۇنى اتالعان قىلمىسقا قاتىسى بار دەگەن كۇدىكتىلەر انىقتالىپ، قاماۋعا الىنعان. جاستارى 22-23 شاماسىنداعى كۇدىكتىلەردىڭ ءبىرى وسىعان دەيىن دە توناۋشىلىقپەن اينالىسقانى ءۇشىن سوتتالعانى بەلگىلى بولدى.
ەسكە سالا كەتسەك، وسىدان تۋرا جارتى جىل بۇرىن، ياعني، اقپاننىڭ 9- كۇنى ارشالى اۋدانىندا تاڭعى ساعات 07:00 شاماسىندا بەتپەردە كيگەن ءۇش بەلگىسىز ازامات قاريانىڭ ۇيىنە تۇسكەن.
پلاستيكالىق تەرەزە ارقىلى كىرگەن قاراقشىلار ۇيدەگىلەردى پىشاقپەن قورقىتىپ، 70 مىڭ تەڭگە اقشا مەن التىن اشەكەيلەردى قولدى قىلىپ كەتكەن. تەرگەۋ بارىسىندا انىقتالعانداي، توناۋشىلار وتباسى مۇشەلەرىن سوققىعا جىعىپ، 160 مىڭ تەڭگەگە شىعىن كەلتىرگەن.
قۇقىق قورعاۋ قىزمەتكەرلەرىنە قىلمىستى ءىزىن سۋىتپاي اشۋ مۇمكىن بولمادى. الايدا، اراعا جارتى جىل سالىپ بارىپ تەرگەۋشىلەردىڭ تىنىمسىز ەڭبەگىنىڭ ارقاسىندا قىلمىستىڭ بەتى اشىلىپ، كۇدىكتىلەر قاماۋعا الىندى.
قازىرگى كەزدە، ولاردىڭ ۇستىنەن ق ر ق ك 179- بابىنىڭ 2- ءبولىمى (توناۋ) بويىنشا قىلمىستىق ءىس قوزعالدى.
اۆتور: اسلان وسپانوۆ
