قىتايدىڭ مۇڭعۇلكۇرە اۋدانىندا الامان ايتىس ءوتتى -فوتو

الماتى. قازاقپارات - 18- شىلدەدە ىلە قازاق اۆتونوميالى وبلىسىنىڭ قۇرىلعاندىعىنىڭ 60 جىلدىق مەرەي تويىنا وراي قىتايدىڭ مۇڭعۇلكۇرە اۋدانىندا الامان ايتىس ءوتتى. 2 مىڭ 300 دەن استام ونەرپازدىڭ قاتىسۋىمەن دايىندالعان كولەمدى بەتاشار كونسەرتىمەن مەرەكە شىمىلدىعى اشىلدى.

اشىلۋ سالتىندا پارادتان وتكەن تۇيەلى كوش، ساياتشىلار شارشى توبى، جەر قايىستىرعان 10 مىڭ جىلقى كورەرمەننىڭ كوڭىل قۇسىن كوككە سامعاتتى. انگليا تازا قاندى جىلقىسى، اراب جىلقىسى، اقالتەكە، قوستاناي جىلقىسى، ورلوۆ دون جىلقىسى سياقتى دۇنيەگە ايگىلى اسىل تۇقىمدى جىلقىلاردىڭ اسەم باسىپ ساحنا الدىنان وتكەندەگى سۇلۋ سىمباتى، كورەرمەن جانىن ەلىتىپ مۇڭعۇلكۇرەنىڭ اتى زاتىنا ساي تۇلپار مەكەنى ەكەنىن ايگىلەدى.

مۇڭعۇلكۇرە اۋدانىدىق 22- كەزەكتى اقىندار ايتىسى دا ءوز بيىگىندە ءوتتى. ايتىسقا قاتىسقان 12 جۇپ اقىن اۋدان اكىمشىلىگى جاعىنان باعالى سىيلىقتارمەن ماراپاتتالدى.

ايسۇلۋ توكەن قىزى

Kazaitys.kz