11:28, 24 - شىلدە 2014 | GMT +5
ب ۇ ۇ يزرايل اسكەري قىلمىس جاسادى دەپ كۇدىكتەنۋدە
استانا. قازاقپارات - ب ۇ ۇ- نىڭ ادام قۇقىقتارى جونىندەگى جوعارى كوميسسارى ناۆي پيللاي يزرايل ارمياسىنىڭ گازا سەكتورىنداعى سودىرلارعا قارسى اۋقىمدى وپەراتسيا جۇرگىزۋ ارقىلى سوڭعى 2 اپتا ىشىندە اسكەري قىلمىس جاساعاندىعىن جوققا شىعارمايدى،
دەپ حابارلادى شەتەلدىك ب ا ق.
پيللايدىڭ سوزىنە قاراعاندا، ب ۇ ۇ ساراپشىلارى يزرايلدىڭ بەيبىت حالىقتى قورعاۋ ءۇشىن گازا سەكتورىنا شابۋىلداۋ شارالارىن قابىلداعاندىعىنا كۇدىك كەلتىرۋدە. «وتكەن اپتادا گازاداعى جاعاجايدا 7 بالانىڭ ءولىمى يزرايلدىك اسكەريلەردىڭ كىناسىن قۋاتتايتىن ايعاق بولۋى مۇمكىن» ، - دەدى ول.
بۇعان قوسا، ول حاماس تارابىنىڭ بەيبىت يزرايلدىكتەردىڭ اجالىنا سەبەپكەر بولعان زىمىران سوققىسىن ايىپتاپ وتىر.
ال يزرايلدىڭ ب ۇ ۇ جانىنداعى وكىلى جوعارى كوميسساردىڭ بۇل ءسوزىن «جەتە ويلاستىرىلماعان مالىمدەمە» دەپ باعالاۋدا. ونىڭ سوزىنە قاراعاندا، يزرايل ءوز اۋماعىن قورعاۋ ماقساتىندا ارەكەت جاساۋدا.
اۆتور: مارلان جيەمباي
