قىتاي مەيرامحانالارىنداعى بورسىعان ەتكە بايلانىستى تۋىنداعان جانجال ءورشىپ بارادى
جىلدام تاماقتانۋ جەلىلەرى - McDonald's پەن KFC قىتايداعى ساپاسىز ەتتى الۋدان باس تارتىپ، تۇتىنۋشىلارىنان كەشىرىم سۇرادى.
ولاردىڭ ءىزىن وسىنداي لاڭعا تاپ بولعان Burger King پەن Starbucks جالعاستىردى. مەرزىمى ءوتىپ، بورسىعان ەتكە بايلانىستى داۋ مۇنىمەن توقتار ەمەس. جاپونيا دا بويكوت جاريالادى. قىتايداعى McDonald's ءدامحانالارىنىڭ ءمازىرى كۇرت قىسقاردى.
اكىمشىلىك ەسىكتەرىنە بۋرگەرلەردى ءسۇيىپ جەيتىن جۇرتشىلىقتان كەشىرىم سۇراپ، ولاردى تەز ارادا قايتا ساتىلىمعا شىعاراتىنىن ايتىپ حابارلاندىرۋلار ءىلىپ تاستاعان. «شاڭحاي حۋسي فۋد» كومپانياسى جەتكىزەتىن ەت ونىمىنەن KFC تەز تاماقتانۋ جەلىسى، سونداي-اق، «پاپا-دجونس» پيتستسەرياسى مەن Starbucks كوفە الپاۋىتى باس تارتتى.
جامانات جەردە جاتقان با؟! جەرگىلىكتى تەلەارنانىڭ «كومپانيا مەيرامحانالارعا بورسىعان ەت تاراتادى» دەگەن حابارى ءاپ-ساتتە تاراپ كەتتى. ءبىراق بۇعان پىسقىرمايتىندار دا بار. ارينە بۇعان كەي ادامدار كوڭىل اۋدارىپ جاتپاعانىمەن، جۇرتتىڭ كوبى فاست-فۋد دەسە باسىن الا قاشاتىن جاعدايعا جەتكەن. بۇل شۋ 20 - شىلدەدە شىققان بولاتىن. شاڭحاي تەلەارناسى جۋرناليستەر قىتايلىق اتىشۋلى كومپانيانىڭ قىزمەتكەرلەرى شيكى ەتتى قولعاپسىز جالاڭ قولمەن الىپ، بورسىعان ەتكە ارالاستىرعانى بايانداعان.
وسى سيۋجەتتەن كەيىن شانحايداعى تاعام ونىمدەرىنىڭ ساپاسىن باقىلاۋ جونىندەگى باسقارما كومپانيانىڭ بارلىق ەت ءونىمىن ساتىلىمنان الىپ تاستاۋدى بۇيىردى. ساراپشىلاردىڭ ايتۋىنشا، تەز تاماقتانۋ جەلىلەرى بۇل جاعدايدا قاسكويلەر ەمەس، كەرىسىنشە زارداپ شەگۋشىلەر. جاپون ۇكىمەتى دە قىتايلىق كومپانيانىڭ ەت ونىمدەرىن الۋدان باس تارتۋ تۋرالى شەشىم قابىلدادى.
اۆتورلارى: ەرنات قاشقىنوۆ، بەيبىت يمبايەۆ
24.kz
