يزرايلدەگى قازاقستاندىقتار تاياۋ ارالىقتا ۇرىس امالدارى ءجۇرىپ جاتقان ايماقتان شىعارىلادى - ق ر س ءى م

استانا. قازاقپارات - يزرايلدەگى ۇرىس امالدارى سالدارىنان وتانىنا دەر ۋاقىتىندا قايتا الماي وتىرعان ديانا نازار مەن باسقا دا قازاقستاندىقتار تاياۋ ارالىقتا قارۋلى قاقتىعىس ايماعىنان شىعارىلادى.

بۇل تۋرالى قازاقپارات تىلشىسىنە ق ر سىرتقى ىستەر مينيسترلىگىنىڭ رەسمي وكىلى نۇرجان ايتماحانوۆ ءمالىم ەتتى.

«سىرتقى ىستەر مينيسترلىگى ءبىزدىڭ ازاماتىمىز ديانا نازارمەن حابارلاستى. وزدەرىڭىزگە ءمالىم بولعانداي، كەشە ول يزرايلدەن تۇركياعا ۇشا الماي قالعان ەدى. ونىڭ سوزىنە قاراعاندا، جاعدايى جاقسى، اۋە كومپانياسى وعان قوناقۇيگە توقتاۋعا مۇمكىنشىلىك جاساعان. سونىمەن قاتار ءبىزدىڭ يزرايلدەگى ەلشىلىكتىڭ حابارلاۋىنشا، بۇگىن تۇركيا اۋە كومپانياسى جەرگىلىكتى ۋاقىتپەن ساعات 21 گە رەيس جوسپارلاپ وتىر. سول رەيسپەن ازاماتشامىز تۇركياعا ورالماق» ، - دەدى ن. ايتماحانوۆ.

ونىڭ اتاپ وتۋىنشە، بۇدان بولەك قۇرامىندا 10-15 ادام بار قازاقستاندىق تۋريستەر توبى دا تۇركياعا ۇشا الماي قالعان. دەگەنمەن ءبىزدىڭ ازاماتتاردىڭ ناقتى سانى انىقتالۋ ۇستىندە. تاسىمالداۋشى اۋە كومپانياسى ولاردىڭ بارلىعىن دا قوناقۇيگە ورنالاستىرعان. ولار دا بۇگىن كەشكىسىن تۇركيالىق اۋە كومپانياسىمەن ۇشىپ شىعادى.

«سىرتقى ىستەر مينيسترلىگى ءبىزدىڭ ازاماتتارىمىزدىڭ بارلىعى دا تۇركياعا ۇشىپ كەتكەنشە بۇل ماسەلەنى ءجىتى باقىلاۋعا الادى جانە قاجەتتى بارلىق كومەكتى كورسەتەدى» ، - دەدى س ءى م وكىلى.

ەستەرىڭىزگە سالا كەتەيىك، بۇعان دەيىن ق ر  ي ج ت م تۋريزم يندۋسترياسى كوميتەتى بارشا قازاقستاندىقتاردى يزرايلدە ورىن الىپ وتىرعان احۋالعا بايلانىستى اباي بولۋعا جانە مۇقياتتىلىق تانىتۋعا شاقىرعان ەدى.

اۆتور: مارلان جيەمباي