قىركۇيەكتەن باستاپ وقۋشىلار مەن اتا- انالار ءۇشىن ۇيالى بايلانىس تەگىن بولماق

استانا. قازاقپارات - قىركۇيەكتەن باستاپ «جاس ۇلان» ءبىرىڭعاي بالالار ۇيىمىنا مۇشە مەكتەپ وقۋشىلارى ءۇشىن ۇيالى بايلانىس تەگىن بولادى.

 بۇگىن استانادا اتالمىش ۇيىم مەن «كار- تەل» ۇيالى بايلانىس وپەراتورى اراسىندا ءتيىستى مەموراندۋمعا قول قويىلدى.

ۇيىم باسشىسى دانيار ءشامىلوۆتىڭ ايتۋىنشا، «جاس ۇلانعا» ەل بويىنشا 1,5 ميلليون مەكتەپ وقۋشىسى مۇشە بولىپ تابىلادى. ەندى ولاردىڭ بارلىعى «بيلاين» ۇيالى بايلانىسىمەن قامتاماسىز ەتىلمەك.

«تاريفكە كەلەتىن بولساق، ول جەلى ىشىندە تەگىن بولادى. وزگە وپەراتورلارعا قوڭىراۋ شالۋ تومەن باعامەن جۇزەگە اسىرىلادى. ينتەرنەتكە كىرۋ وتە ارزان، ال ەڭ تانىمال الەۋمەتتىك جەلىلەردى پايدالانۋ ءتىپتى تەگىن» ، - دەيدى ول.

بۇل باستامانى «جاس ۇلان» بەلسەندىلەرى ويلاپ تاۋىپتى. «بيلاين» جەلىسىنىڭ باسشىلىعى بولسا، بۇنى جەردە قالدىرماي، ءوز دەڭگەيىندە قولداعان.

«بيلاين» ۇسىنعان ارنايى تاريفتەرى بار نومىرلەر ءاربىر مەكتەپتەگى «جاس ۇلان» ۇيىمىنىڭ بولىمشەلەرى ارقىلى بارلىق مۇشە وقۋشىلارعا جانە ولاردىڭ اتا- انالارىنا تەگىن تاراتىلادى.

 اۆتور: جاسۇلان جولدىبايەۆ