تۇركيانىڭ تاڭداۋلى اياق كيىمىن وڭتۇستىك قازاقستان وبلىسىندا شىعارۋ جوسپارلانۋدا
ەسكە سالا كەتەيىك، وبلىس اكىمدىگىنىڭ ۇيىمداستىرۋىمەن ءوڭىر بيزنەسمەندەرى ونەركاسىبى مەن ءوندىرىسى دامىعان ىستامبۇل، ءىزمىر، دەنيزلي قالالارىندا بولىپ، «وڭتۇستىك قازاقستان وبلىسىنىڭ ينۆەستيتسيالىق مۇمكىندىكتەرى اتتى» بيزنەس- فورۋمدار وتكىزگەن بولاتىن.
اكىمدىكتىڭ باسپا ءسوز قىزمەتىنەن حابارلانعانىنداي، ءىس- شارالارعا وڭتۇستىك قازاقستاندىق كاسىپكەرلەردەن بولەك، تۇرىك ەلىنىڭ 200 دەن استام ءىرى بيزنەس وكىلدەرى قاتىستى. ولارعا وڭتۇستىك قازاقستان وبلىسىنىڭ ينۆەستيتسيالىق الەۋەتى، دالىرەك ايتقاندا جەڭىل ونەركاسىپ، ازىق- تۇلىك ونەركاسىبى، توقىما، ماشينا قۇراستىرۋ، فارماتسيەۆتيكا، تۋريزم جانە ت. ب. سالالارىنداعى مۇمكىندىكتەر مەن وبلىستا ينۆەستورلارعا جاسالىپ جاتقان قولايلى جاعدايلار تانىستىرىلدى.
«بيزنەس فورۋمدار بارىسىندا ۇيىمداستىرىلعان ەكىجاقتى كەزدەسۋلەر ناتيجەسىندە جالپى سوماسى 511 ميلليون ا ق ش دوللارىن قۇرايتىن 30 عا جۋىق ناقتى جوبالار بويىنشا كەلىسىمگە قول جەتكىزىلدى. اتاپ ايتقاندا، وڭتۇستىك قازاقستان وبلىسى اۋماعىندا تۇركيالىق «BMC», «Ford Otosan», «Otokar» ءىرى كومپانيالارمەن بىرلەسىپ ماشينا قۇراستىرۋ زاۋىتتارىن سالۋ، تۋريزم سالاسىندا «Somaltin» جانە «Collossae» كومپانيالارىمەن بىرلەسىپ سارى اعاش جانە تۋريزمنىڭ دامۋى بويىنشا الەۋەتى مول باسقا اۋدانداردا 3 قوناق ءۇي تۇرعىزۋ، تۇرمىستىق تەحنيكا شىعارۋ بويىنشا «Vestel» كومپانياسىمەن كاسىپورىن قۇرۋ، بەس توقىما فابريكاسىن اشۋ قاراستىرىلدى. سونىمەن قاتار، تۇركيا ەلىندە اياق- كيىم ءوندىرىسى بويىنشا ۇزدىك 10-دىققا كىرەتىن «Forelli» كومپانياسىمەن اياق- كيىم شىعاراتىن ونەركاسىپ اشۋ بويىنشا ناقتى كەلىسىمگە قول جەتكىزىلدى» ، - دەلىنگەن باسپا ءسوز بايانىندا.
تۇركيالىق «Forelli» اياق- كيىم شىعارۋ كومپانياسىنىڭ وكىلى حاكان دەميرجيدىڭ ايتۋىنشا، بيزنەس فورۋمدا قازاقستاندا شەتەلدىك ينۆەستورلارعا ۇسىنىلاتىن جەڭىلدىكتەر تۋرالى اقپاراتپەن تولىق تانىسۋعا مۇمكىندىك بولدى. «ۇسىنىلىپ جاتقان سالىق تولەمدەرى، جالپى شارتتارى بىزگە ۇناپ وتىر. ەندىگى كەزەكتە وڭتۇستىك قازاقستان وبلىسىندا اياق- كيىم شىعارۋ بويىنشا ءوندىرىس ورنىن اشۋ جوسپاردا بار. بۇل باعىتتا بۇگىن ءبىراز كەلىسسوزدەر جۇرگىزىلدى. بىرىگىپ جاسايتىن جۇمىستار ناتيجەلى بولادى دەپ ويلايمىن» ، - دەدى ول.
اۆتور: قانات مامەتقازى ۇلى
