كلۋبىمىزدان شىن مىقتىلارعا ەسە جىبەرمەيتىن ءالى بەلگىسىز جاستار شىعادى - نازاروۆ

استانا. قازاقپارات - «بارىس» حوككەي كلۋبىنىڭ باس باپكەرى اندرەي نازاروۆ رەسەيلىك «سپورت ەكسپرەسس» ينتەرنەت سايتىنا بەرگەن سۇحباتىندا «بارىس» كلۋبىندا شىن مىقتىلاردىڭ وكشەسىن باسىپ كەلە جاتقان ءالى ەشكىمگە بەلگىسىز حاس دارىندى جاستار شىعاتىندىعىن مالىمدەدى.

«ق ح ل ماۋسىمىندا كومانداداعى 25 ويىنشىنىڭ بارلىعى جوعارى ونەر كورسەتەدى دەپ ۇمىتتەنەمىن. نەگىزگى نازار يگور كاليانين، ۆلاديمير ۆوروبيەۆ، اندرەي شايانوۆ سىندى جاس حوككەيشىلەرگە اۋدارىلادى. «بارىستىڭ» باسقا باپكەرلەرى جاس سپورتشىلارعا كوڭىل اۋداراتىن بولادى. كوماندادا وتە ۇلكەن باسەكەلەستىك، بارلىعىندا كەلىسىمشارت بار. ءبىراق نەگىزگى قۇرامنىڭ وكشەسىن باسىپ كەلە جاتقان جاستار جەتەرلىك. مىسالى، سپورتتىق تۇرعىدا قاتال قورعاۋشى - ماديار يبرايبەكوۆ. ول ماعان داريۋس كاسپارايتيستى ەسكە سالادى، دەگەنمەن ول دەنە ىرىلىگى بويىنشا «گانستان» اسىپ تۇسەدى»، - دەيدى باس باپكەر.

ونىڭ ايتۋىنشا، كوماندانىڭ ويىنى بيىل وزگەشەلەۋ بولادى. «كوماندا ويىنىن جىلدامىراق، ودان ءارى تەگەۋرىندى ەتۋدى جوسپارلاۋدامىز. سونىمەن قاتار كوماندانى اڭگىمەگە اشىق ەتىپ جاساماقپىز. ول قازاقستاندا ەڭ مەديالىق ۇجىم بولماق. مۇمكىن بارشا ق ح ل اۋماعىندا دا بۇل جاعىنان ەڭ ۇزدىك بولۋى ىقتيمال. كلۋبىمىزدا ۇندەمەيتىن ويىنشىلار بولمايدى»، - دەدى ا. نازاروۆ.

ايتا كەتەيىك، تانىمال رەسەيلىك مامان «بارىس» كلۋبىنا جاقىندا عانا باس باپكەر بولىپ تاعايىندالعان بولاتىن.

اۆتور: جاسۇلان جولدىبايەۆ