سۆەتلانا پودوبەدوۆا، مايا مانەزا مەن زۇلفيا چينشانلو باسپانالارىنان ايىرىلىپ قالۋدان ۇرەيلەنىپ وتىر
«2009 - جىلى الەم بىرىنشىلىگىندە جەڭىس اكەلگەنىمىز ءۇشىن بىزگە تالدىقورعاننان ەكى بولمەلى پاتەرلەر سىيعا تارتقان بولاتىن. دەگەنمەن، ولار ءبىزدىڭ اتىمىزدا ەمەس، قولىمىزدا بارى - تەك جالعا الۋ تۋرالى كەلىسىم. مەن الماتى وبلىسىنىڭ اكىمى اڭسار مۇساحانوۆپەن جەكە سويلەسىپ، بۇل ماسەلەنى شەشۋىن ءوتىندىم. مايا دا حابارلاستى. اكىم بىرەۋلەرگە قوڭىراۋ شالىپ جاتتى، الايدا «باياعى جارتاس سول جارتاس»، - دەيدى س. پودوبەدوۆا.
ونىڭ سوزىنە قاراعاندا، ول پاتەرلەردى الماتى وبلىسىنىڭ سپورت باسقارماسى ساتىپ الۋ كەرەك بولعان.
«مەنىڭ بىلۋىمشە، ءبىزدىڭ ءوڭىردىڭ بالۋاندارىنا پاتەر بەرگەن. ءبىراق ولار وزدەرىنىڭ اتتارىندا تۇر. پەكين وليمپياداسىنىڭ وزگە جەڭىمپازدارىندا دا مۇنداي ماسەلە جوق، سىيعا بەرىلگەن باسپانانىڭ بارلىعى اتتارىنا اۋدارىلىپتى»، - دەپ اتاپ ءوتتى زىلتەمىرشى.
سپورتشىلاردىڭ سوزىنە قاراعاندا، قازىرگى ۋاقىتتا سىيعا تارتىلعان باسپانا قىزمەتتىك پاتەرلەر رەتىندە ەسەپتە تۇر.
اۆتور: جاسۇلان جولدىبايەۆ
