قاراعاندى وبلىسىندا لاڭكەستىك توپ قۇرىپ، ءبىرقاتار اسا اۋىر قىلمىستار جاساعان تۇلعالارعا ۇكىم شىعارىلدى

استانا. قازاقپارات - قاراعاندى وبلىستىق قىلمىستىق ىستەر جونىندەگى مامانداندىرىلعان اۋدان ارلىق سوتى سۋدياسى ق. قاسىموۆ وڭىردە لاڭكەستىك توپ قۇرىپ، ءبىرقاتار اسا اۋىر قىلمىستار جاساعان تۇلعالارعا ۇكىم شىعاردى.

بۇل تۋرالى اتالعان سوتتىڭ باسپا ءسوز قىزمەتىنەن حابارلادى.

سوتتالۋشىلار 2012 - جىلدىڭ شىلدە ايىنان باستاپ 2013 - جىلدىڭ قاراشا ايى ارالىعىندا جەزقازعان قالاسى اۋماعىندا قوعامدىق قاۋىپسىزدىككە پەن تارتىپكە قارسى ءبىر قاتار اۋىر جانە اسا اۋىر قىلمىس جاساعان.

جەزقازعان اۋماعىنىڭ تۇرعىندارى ا. ماشايىقوۆ، ە. قۋانىشوۆ، ۋ. بيشەنوۆ، ە. مولدابەكوۆ، گ. مۇقانوۆ، ن. ميرزاحمەدوۆ، ر. قوجابەكوۆ، ج. سارسەنبەك جانە ا. ابدىبەكوۆ ءداستۇرلى ەمەس راديكالدى يسلامنىڭ جاقتاۋشىلارى رەتىندە ءدىني ءبىلىم الۋ ماقساتىندا الەكساندريا قالاسىنا (مىسىر) بارعان.

وندا رەسەي فەدەراتسياسىنىڭ ازاماتى يسلامنىڭ اسا راديكالدى يدەيالارىنا قۇلشىلىق ەتۋشى، «ابۋ-حانيف» ءدىني لاقاپ اتىن جامىلعان ش. يزمايلوۆتىڭ «Sharhsunna» راديكالدىق ماركاز وقۋ ورنىندا ءدارىس العان.

اتالعان ماركازدا ءدارىس الۋ بارىسىندا ولار راديكالدى يسلام يدەولوگتارىنىڭ ىقپالىنا ءتۇسىپ، «تاكفيرلىك» كوزقاراستى قابىلداپ، «جەكە جانە قارۋلى جيھادتى» جۇرگىزۋ داعدىلارىن ۇيرەنگەن. 2012 - جىلدىڭ اياعىندا اتالعان تۇلعالار سيريا اراب رەسپۋبليكاسىنىڭ ۇكىمەتتىك اسكەرىنە قارسى كوتەرىلىسشىلەر جاعىندا «قارۋلى جيھادقا»، ياعني، سوعىس قيمىلدارىندا قاتىسۋعا شەشىم قابىلداعان.

2012 - جىلدىڭ قاراشا ايىنان باستاپ 2013 - جىلدىڭ قاراشا ايىنا دەيىن ا. ماشايىقوۆ جەزقازعان جانە ساتبايەۆ قالالارى اۋماعىندا «ءال-كايدا» حالىقارالىق تەرروريستىك ۇيىمىنىڭ قۇرامىنا كىرەتىن «ءابۋ-حانيف جاماعاتى» توبىنىڭ ءبىر سالاسى بولىپ تابىلاتىن لاڭكەستىك توپ قۇرعان.

2012-2013 - جىلدار ارالىعىندا ول باسشىلىق ەتكەن تەرروريستىك توپقا، قۇپيالىق شارالارىن ساقتاي وتىرىپ، تەرروريستىك ماقساتتى كوزدەيتىن قىلمىستاردى جاساۋ نيەتىمەن ب. قۋانىشوۆ ە. احمەتوۆ، ن. تولەگەنوۆ جانە م. راحماتۋللين كىرگەن.

تەرروريستىك توپتىڭ مۇشەسى ب. قۋانىشوۆ وزدەرىنىڭ قىلمىستىق ءىس ارەكەتتەرى قۇقىق قورعاۋ ورگاندارىنا ءمالىم بولىپ، ۇستالۋ قاۋپى تونگەن ۋاقىتتا جانە ءوزى مۇشەلىك ەتكەن تەرروريستىك توپ مۇشەلەرىن باسقا دا قاۋىپ-قاتەردەن قورعاۋ ءۇشىن قارۋ-جاراق جانە وق دارىلەردى زاڭسىز ساتىپ العان.

وسىلايشا قىلمىستارى اشكەرە بولعان ا. ماشايىقوۆ 12 جىلعا، ب. قۋانىشوۆ 8 جىلعا، ە. احمەتوۆ 9 جىلعا ن. تولەگەنوۆ 8 جىلعا باس بوستاندىعىنان ايىرۋ جازاسىنا كەسىلدى.

اۆتور: مارلان جيەمباي