قازاقستاننىڭ «قاتونقاراعاي» مەن «اقجايىق» تابيعي پاركى بۇكىل الەمدىك بيوسفەرالىق قورلار جۇيەسىنە ەندى

استانا. قازاقپارات - قازاقستاننىڭ «قاتونقاراعاي» جانە «اقجايىق» تابيعي پاركتەرى يۋنەسكو- نىڭ بۇكىل الەمدىك بيوسفەرالىق رەزەرۆاتتار جۇيەسىنە ەنگىزىلدى.

بۇل تۋرالى استانادا يۋنەسكو ىستەرى جونىندەگى ۇلتتىق كوميسسيالاردىڭ ايماق ارالىق 1 - كەڭەسى بارىسىندا ءمالىم بولدى.

 توقتالا كەتەتىن جايت، اعىمداعى جىلدىڭ ماۋسىم ايىندا يۋنەسكو- نىڭ حالىقارالىق ۇيلەستىرۋ كەڭەسىنىڭ شەشىمىمەن قازاقستاننىڭ «قاتونقاراعاي» جانە «اقجايىق» تابيعي پاركى يۋنەسكو بۇكىل الەمدىك بيوسفەرالىق رەزەرۆاتتار جۇيەسىنە ەنگىزىلگەن ەكەن. وسىعان وراي، ۇلتتىق كوميسسيالاردىڭ بىرىنشى ءوڭىرارالىق كەڭەسى بارىسىندا ارنايى سەرتيفيكاتتى يۋنەسكو باس ديرەكتورىنىڭ وكىلى ەريك فالت قازاقستاننىڭ قورشاعان ورتا جانە سۋ رەسۋرستارى ءمينيسترى نۇرلان قاپپاروۆقا تابىس ەتتى.

 بۇعان دەيىن حابارلاعانىمىزداي، ەكى تابيعي پاركتەن بولەك بيىل قازاقستاننىڭ 8 نىسانى يۋنەسكو الەمدىك مۇرالار قاتارىنا وتكەن. سونىمەن بىرگە، قازاقستان، قىرعىزستان جانە قىتاي تاراپتارى بىرلەسە دايىنداعان «ۇلى جىبەك جولى: جىبەك جولىنىڭ باستاپقى بولىگى، تيان- شان ءدالىزى باعىتتارىنىڭ جۇيەسى» جونىندەگى سەريالىق ترانس شەكارالىق نوميناتسياسىنىڭ يۋنەسكو بۇكىلالەمدىك مۇرا تىزىمىنە ەنگىزىلدى.

ەسكە سالايىق، استانادا يۋنەسكو ىستەرى جونىندەگى ۇلتتىق كوميسسيالاردىڭ ايماق ارالىق 1 - كەڭەسى وتۋدە. شاراعا يۋنەسكو- نىڭ بارلىق بەس وڭىرلىك توپتارىنان، اتاپ ايتقاندا، اراب مەملەكەتتەرى، ازيا جانە تىنىق مۇحيتى، ەۋروپا جانە سولتۇستىك امەريكا، لاتىن امەريكاسى مەن كاريب باسسەينى ەلدەرىنەن 125 مەملەكەتتىڭ ۇلتتىق كوميسسيالارىنىڭ وكىلدەرى قاتىسۋدا.

اۆتور: قانات مامەتقازى ۇلى