قىرعىزدار الەمدى اۋزىنا قاراتپاقشى
بۇل ماسەلە 8-14 -قىركۇيەك ارالىعىندا ىستىقكول جاعاسىندا ۇيىمداستىرىلماقشى ءىرى ۇلتتىق ويىندار وتكىزۋگە ارنالعان مەملەكەتتىك ورگانداردىڭ كەڭەسىندە كوتەرىلگەن.
دۇنيەجۇزىلىك ويىندارعا قازاقستاننان، تۇركيادان، وزبەكستاننان، تاجىكستان، تۇرىكمەنستان، گاگاۋزيا، ءازىربايجان مەن موڭعوليادان دەلەگاتسيالار قاتىسپاقشى. قىرعىزداردىڭ ايتۋىنشا، كوشپەندىلەردىڭ دۇنيەجۇزىلىك ويىندارى - وليمپيالىق، ازيا جانە پاراليمپيالىق ويىنداردىڭ بالاماسى بولماق. باعدارلاماعا كوكپار، توگۋز-كورگوول، قىرعىز كۇرەسى، الىش، اۋدارىسپاق، ات شابىس، جورعا سالىس، قۇنان شابىس، وردا، قىز قۋۋ، تەنگە ءىلۋ، قۇلاتۋ، سالبۋرىن سەكىلدى ويىن تۇرلەرى ەنگىزىلگەن.
جارىستاردى وتكىزۋ تۋرالى كەلىسىمگە 2012 - جىلى بىشكەكتە تۇركى تىلدەس مەملەكەتتەر باسشىلارىنىڭ سامميتىندە قول قويىلعان. وسىلايشا ايىرقالپاقتى اعايىن كوشپەندىلەردىڭ دۇنيەجۇزىلىك ويىندارىن - سپورتتىڭ ەتنيكالىق تۇرلەرىن ناسيحاتتاۋ ارقىلى ونى ساقتاۋدى ماقسات ەتىپ وتىر.
بۇل از بولسا، قىرعىزستان اقپارات اگەنتتىگى ىستىقكول جاعالاۋىندا وتەتىن ۇلان- اسىر تويدى تاماشالايتىندار سانى جارتى ميللياردقا جەتەتىندىگىن حابارلادى. «ترانسلياتسيا ونلاين رەجيمدە وتەدى. ءبىز ويىن بارىسىن 500 ميلليون كورەرمەن كورەدى دەپ وتىرمىز» دەگەن تۋريزم دەپارتامەنتىنىڭ ديرەكتورى ماقسات چاكيەۆ كەلەر اپتادا كوشپەندىلەر ويىنىنىڭ سايتى دا ىسكە قوسىلاتىندىعىن مالىمدەدى. وندا كوشپەندىلەردىڭ دۇنيەجۇزىلىك ويىندارىنا قىزىعۋشىلىق بىلدىرگەندەر جاعىمدى جاڭالىقتارمەن تانىسا الادى.
وكىنىشكە قاراي، كورشى ەلدىڭ قولعا العان كەرەمەتتەرىن العاش كوتەرگەن قازاقتار ەدى. ەستەرىڭىزدە مە، وسىدان بىرنەشە جىل بۇرىن ەرلان سەرجان ۇلى دەگەن ازامات - «ادال ازامات» قوعامدىق قورىنىڭ ۆيتسە-پرەزيدەنتى، «ۇلى دالا ويىندارى» تەلەجوباسىنىڭ باس پروديۋسەرى رەتىندە جارق ەتە قالعان. ءتىپتى «ۇلتتىق باسپا ءسوز كلۋبىندا» ارنايى باسپا ءسوز ءماسليحاتىن ۇيىمداستىرىپ، ۇلتتىڭ جوعىن جوقتاپ جۇرگەنىن، اماندىق بولسا، قاستەرلى قۇندىلىقتاردىڭ ءبارىن قالپىنا كەلتىرەتىنىن مالىمدەدى.
ەرلان ءبىر سۇحباتىندا «ۇلى دالا ويىندارى» - اتا-بابا داستۇرىمەن قانعا سىڭگەن ۇلتتىڭ ۇلى قۇندىلىقتارىن سارقىلمايتىن ساف قازىنا ەتىپ، بۇگىنگى ۇرپاققا جاڭا قىرىنان جەتكىزۋگە تالپنىس بىلدىرگەن العاشقى اۋقىمدى جوبا دەگەن-ءدى. «CaspіoNet» «ەل ارنا» ، «حابار» جەكسەنبى سايىن قوعامدىق قور تۇسىرگەن قىزىقتى حابارلاردى جۇرتقا كورسەتىپ تە ۇلگەردى. وسىلاي باستالعان باياندى ءىستىڭ سوڭى سيىرقۇيىمشاقتانىپ تىندى. ەرلانعا ەل ىزدەۋ سالاتىن كۇن تۋارىن سول كەزدە ەشكىم ويلاماعانى دا انىق.
بارىنەن قىزىعى، بىشكەك قالاسىندا «ادال ازامات» قوعامدىق قورى مەن قىرعىزستاندىق «االام وردو» مادەني- ەتنوگرافيالىق ورتالىق وكىلدەرى ارنايى باسپا ءسوز ءماسليحاتىن وتكىزدى. بۇل جيىننىڭ ماقساتى - 1- حالىقارالىق تۇرىك ويىندارىن وتكىزۋ جوسپارىمەن ب ا ق ارقىلى حالىقتى تانىستىرۋ ەدى. وسىلايشا ايىرقالپاقتى اعايىندار دا ەرلانعا قاتتى سەندى، بارلىق جاعىنان قول ۇشىن سوزدى.
«الام وردو» مادەني- ەتنوگرافيالىق ورتالىعىنىڭ نەگىزىن قالاۋشى، قوعام قايراتكەرى، مەتسەنات تاشقۇل كەرەكسىزوۆ تۇركىگە ورتاق قۇندىلىقتاردى قورعاۋ جانە ونى ناسيحاتتاۋدا قازاقستاندىق پىسىق جىگىتتەردەن قاراجاتىن دا ايامادى. قازاقستاندا باستاۋ العان «ۇلى دالا ويىندارى» جوباسى ىستىقكول جاعالاۋىندا وتكىزىلەر بولسا، قارجىلىق قولداۋ كورسەتۋگە دايىن ەكەندىكتەرىن ايتتى.
«ۇلتتىق ويىنداردىڭ ءبىرتۇتاس برەندىن قالىپتاستىرۋعا اتسالىسىپ جۇرگەن جىگىتتەر «ۇلى دالا ويىندارىن» «حالىقارالىق تۇركى ويىندارى» دەڭگەيىنە كوتەرىپ، ونىڭ العاشقى قارلىعاشىن قىرعىز رەسپۋبليكاسىندا ۇشىرۋعا بەل بايلادى» دەگەن باسىلىمدار مۇنىڭ سوڭى قىرۋار قاراجاتتىڭ شاشىلىپ، ول الدەكىمدەردىڭ قالتاسىندا كەتەرىن ويلاماعان دا سەكىلدى.
اقىرى قازاق-قىرعىز جوباسى اياقسىز قالدى. جەرلەستەرىمىز كورشى ەلدىڭ كوپ ازاماتىن جەرگە قاراتتى. بۇل عانا ما، جەرگە قاراعاندار ءوز جەرىمىزدە دە جەتكىلىكتى كورىنەدى. قازىر «ۇلى دالا ويىندارى» قوعامدىق قورى قايدا ورنالاسقانىن، ونى باسقاراتىن بەدەلدى ازاماتتاردىڭ قايدا جۇرگەنىن ەشكىم بىلمەيدى. ەسەسىنە، قىرعىزدار كوشپەندىلەردىڭ دۇنيەجۇزىلىك ويىندارىن ۇيىمداستىرىپ، تۇركى جۇرتىنىڭ تاريحىندا قالعالى وتىر.
«ايقىن»
