مۇگەدەكتەردى جۇمىسقا ورنالاستىرۋ ءۇشىن وبلىستارداعى بوس ورىندار سانى انىقتالدى

استانا. قازاقپارات - ق ر ەڭبەك جانە حالىقتى الەۋمەتتىك قورعاۋ مينيسترلىگىندە ق ر پرەمەر-ءمينيسترىنىڭ ورىنباسارى گۇلشارا ءابدىقالىقوۆانىڭ توراعالىعىمەن مۇگەدەكتەردى الەۋمەتتىك قورعاۋ سالاسىنداعى ۇيلەستىرۋ كەڭەسىنىڭ وتىرىسى ءوتتى.

وتىرىسقا مۇمكىندىكتەرى شەكتەۋلى ادامداردىڭ قوعامدىق ۇيىمدارىنىڭ مۇشەلەرى، سونداي-اق ورتالىق مەملەكەتتىك ورگانداردىڭ جانە قازاقستاندا جۇمىس ىستەيتىن حالىقارالىق ۇيىمداردىڭ وكىلدەرى قاتىستى. كەڭەسكە بەينەبايلانىس رەجيمىندە 14 وبلىستىڭ، الماتى مەن استانا قالالارىنىڭ اكىمدەرى قوسىلدى.

2014 - جىلعى 1 - قاڭتارداعى دەرەكتەر بويىنشا، ەڭبەككە قابىلەتتى جاستاعى مۇگەدەك ادامداردىڭ جالپى سانى 404851 ادامدى قۇرادى. مينيسترلىكتە ەلدەگى مۇگەدەكتىكتىڭ قۇرىلىمىنا ەگجەي-تەگجەيلى تالداۋ جاسالدى.

ونىڭ قورىتىندىسى بويىنشا جۇمىس ىستەپ جاتقان مۇگەدەك ادامداردىڭ (ءبىرىنشى جارتى جىلدىڭ قورىتىندىسى بويىنشا - 95642) سانى، سونداي-اق اۋرۋدىڭ اۋىر تۇرلەرىمەن اۋىراتىندىقتان جانە مۇمكىندىكتەرى شەكتەۋلى بولعاندىقتان، دەنساۋلىعىنا بايلانىستى جۇمىسقا ورنالاسا المايتىن مۇگەدەك ادامداردىڭ سانى انىقتالدى. مۇنىمەن قوسا، جۇمىسقا ورنالاسۋعا مۇقتاج ەڭبەككە قابىلەتتى مۇگەدەك ادامداردىڭ جاس قۇرىلىمى، ولاردىڭ ءبىلىم دەڭگەيلەرى، بىلىكتىلىكتەرى انىقتالدى.

مۇمكىندىكتەرى شەكتەۋلى ادامداردى جۇمىسقا ورنالاستىرۋ ءۇشىن جەرگىلىكتى اتقارۋشى ورگاندارمەن بىرلەسىپ، ءاربىر وبلىستارداعى كاسىپورىندار مەن ۇيىمدارداعى بوس ورىندار سانى انىقتالىپ، مۇگەدەك ادامداردى جۇمىسپەن قامتۋ كارتاسى ازىرلەندى.

2014 - جىلدىڭ باسىنان 1 - شىلدەگە دەيىنگى كەزەڭدە ەلدە 9727 مۇمكىندىكتەرى شەكتەۋلى ادام جۇمىسقا ورنالاستىرىلدى، ونىڭ ىشىندە 2447 ادام - «جۇمىسپەن قامتۋ جول كارتاسى 2020» باعدارلاماسى اياسىندا، 7280 ادام وڭىرلىك باعدارلامالار ارقىلى («مەملەكەتتىك يننوۆاتسيالىق دامۋ باعدارلاماسى»، «سالاماتتى قازاقستان» جانە ت. ب.) قىزمەت تاپتى.

اۆتور: رۋسلان عابباسوۆ