ەرتەڭ قازاقستاندىق ەكسپەديسيا قاشقارعا جول تارتادى

استانا. قازاقپارات - ەرتەڭ «شوقان ءۋاليحانوۆتىڭ كەرۋەن جولى بويىنشا» عىلىمي- تانىمدىق ەكسپەديسيا قاشعارياعا قاراي ساپارعا شىقپاق.

بۇل تۋرالى بۇگىن ەكسپەديسيا جەتەكشىسى، گەوگراف وردەنبەك مازبايەۆ ءمالىم ەتتى.

اتالمىش جوبا شوقان ءۋاليحانوۆتىڭ 180 جىلدىعىنا ارنالعان. كەيىن وسى جۇمىستاردىڭ قورىتىندىسى رەتىندە ەكسپەديتسيا تۋرالى البوم جاريالانىپ، فيلم تۇسىرىلمەك.

 و. مازبايەۆتىڭ ءمالىم ەتكەنىندەي، كەرۋەن ەرتەڭ جولعا شىعادى، ونىڭ قۇرامىندا عالىمداردان، گەوگرافتاردان، تۋريزم سالاسىنىڭ ماماندارىنان قۇرالعان 10 ادام بار. ەكسپەديسيا ق ح ر مەن قىرعىزستاننىڭ اۋماعى بويىنشا ش. ءۋاليحانوۆتىڭ باعىت- باعدارىمەن جۇرگىزىلەدى ۇزاقتىعى 6 مىڭ شاقىرىمدى قۇرايدى: ءۇرىمجى - قاراشاھار - كورلا - كۇچار - اقسۋ - اتۋش - يانگيسار - ياركەن - قاعىلىق - حوتان - قاشعار - تۋراقات - نارىن - تاش- رابات - بىشكەك.

 «ەرتەڭ ءبىز ۇرىمجىگە جول تارتامىز، ودان قاشقارعا قاراي بەت الىپ، جولاي قوتان، اتۋش قالالارىنان وتەمىز. بۇل قالالار شوقان جازعان عىلىمي ەڭبكتەردە جاقسى سۋرەتتەلگەن مەكەن. سودان سوڭ ءبىز تۇراقات ارقىلى قىرعىز اۋماعىنا وتەمىز. شوقان ءۋاليحانوۆتىڭ ىزىمەنەن ەلگە ورالامىز. جولدا شوقاننىڭ كۇندەلىگىندە جازىلعان تاش- رابات كەرۋەن سارايعا باس سۇعامىز» ، - دەيدى ول.

سونىمەن قاتار، ونىڭ ايتۋىنشا، ەكسپەديسيانىڭ ەكىنشى ماقساتى شەتەلدىك تۋريستەرگە «ورتالىق ازياداعى ۇلى جىبەك جولى» اتتى ەكسكۋرسيالىق تۋردى جاساپ بەرۋ.

«ۇلى جىبەك جولىن دامىتۋ قاجەت. ول ءۇشىن قازاقستاندىقتار مەن شەتەلدىكتەر ءۇشىن قىزىقتى بولاتىنداي تۋريستىك تۋرلار ۇيىمداستىرۋ كەرەك. ەكسپو-2017 كورمەسى جاقىنداپ كەلەدى. استاناعا كەلگەن مەيماندار وسى تۋرلار ارقىلى ءتورت مەملەكەتتى: قازاقستان، قىتاي، قىرعىزستان، وزبەكستاندى ارالاپ شىعا الادى.

«شوقاننىڭ سول كەزدەگى ميسسياسى - الەمگە بەيمالىم قاشقار ءوڭىرىن انىقتاۋ، زەرتتەۋ بولدى. ونىڭ ساپارى جاسىرىن تۇردە ءوتتى، ول كەرۋەنمەن بىرگە كوپەس رەتىندە بارىپ، قاشقار قالالارىن زەرتتەدى. بۇل ورىس گەوگرافيالىق قوعامىندا ۇلكەن جاڭالىق بولاتىن. ءبىزدىڭ ماقساتىمىز - شوقاننىڭ باسىپ وتكەن جەرلەرىنە بارىپ، عالىم سۋرەتتەگەن قاشقار قالالارىنىڭ سوڭعى 155 جىلداعى وزگەرىستەرىنىڭ قانداي بولعانىن انىقتاۋ. ەگەر ول كىسىنىڭ كوزدەگەنى - سول ەلدىڭ سالتىن، ءداستۇرىن، بەكىنىستەرىن، قالالارىنىڭ قونىستانۋىن انىقتاۋ بولسا، ءبىزدىڭ ماقسات - سول ەلدىڭ تابيعاتىن، مادەنيەتىن، تۋريزمگە دەگەن الەۋەتىن زەرتتەۋ.

 قازاقستاندىق تۋريزمدى دامىتۋ ءۇشىن جاڭا تۋريستىك تۋرلاردى جاساقتاۋ قاجەت. حالىق قالت ەتسە، شەتەلگە قىدىرادى، سىرتقا اقشا شىعارىپ جاتىرمىز. نەگە كەرىسىنشە شەتەلدىكتەردى قازاقستانعا شاقىرىپ، الكەي مارعۇلاننىڭ جۇرگەن جەرىندە، قانىش ساتبايەۆ پەن شوقان ءۋاليحانوۆتىڭ شەككەن ساپارلارى ىزىمەن نەگە تۋرلار ۇيىمداستىرماسقا؟ !» ، - دەيدى وردەنبەك مازبايەۆ.

گەورگرافتىڭ ايتۋىنشا، بۇل تۋر 3-5 مىڭ ا ق ش دوللارى شاماسىندا بولۋى ىقتيمال. ءبىراق 4 مەملەكەتتى ارالاۋ مۇمكىندىگى مەن 6 مىڭ شاقىرىم جولدى ءجۇرىپ ءوتۋ ءۇشىن بۇل سونشالىقتى كوپ تە ەمەس.

 اۆتور: جاسۇلان جولدىبايەۆ