قىتايمەن شەكارالاس اۋىلدار يەسىز قالماۋى كەرەك

استانا. قازاقپارات - شىعىس قازاقستان - ءبىرقاتار اۋداندارى كورشىلەس قىتايمەن شەكارالاس جاتقان ەلىمىزدىڭ شۇرايلى ءوڭىرى.

تارباعاتاي، ءۇرجار اۋداندارى سەكىلدى زايسان مەن كۇرشىمنىڭ دە تىنىس-تىرشىلىگى «اسپان استى» ەلىنىڭ كوز الدىندا ءوتىپ جاتىر.

بۇل وڭىردەگى ەلدى-مەكەندەردىڭ تۇرعىندارىنىڭ وزگە جاققا قاراعاندا ىرگەسىندەگى قىتايعا بارىپ كەلۋى قيىنعا سوقپاعانىمەن، شەشىمىن تاپپاي كەلە جاتقان وزەكتى ماسەلەلەرى دە جەتىپ ارتىلادى.

سول سەبەپتەن دە اۋىلدارىنىڭ اسىعىن الشىسىنان تۇسىرمەي، حالىقتىڭ كوكەيىندەگى تۇيتكىلدى تارقاتۋ مۇمكىن ەمەس. "الاش ايناسى" بۇل جايىندا شەگارا شەبىردە بولىپ قايتقان ءتىلشىمىز  وي تولعايدى.

وسىنى جەتە تۇسىنگەن ق ر پارلامەنت ءماجىلىسىنىڭ دەپۋتاتى نۇرتاي سابيليانوۆ زايسان، كۇرشىم اۋداندارىنداعى سايلاۋشىلارىمەن كەزدەسكەندە شەكارالىق اۋماقتاردا ورنالاسقان اۋىلداردى دامىتۋ قاجەتتىگىنە باسا نازار اۋداردى. ول ءۇشىن ارينە مەملەكەتتىك باعدارلامالاردىڭ ورىندالۋىن قاتاڭ باقىلاۋعا الۋ قاجەت.

ءبىر اپتا ىشىندە 20 عا جۋىق شالعاي اۋىلدارعا ارنايى ات سابىلتقان حالىق قالاۋلىسى تۇرعىنداردىڭ الاڭداتقان ماسەلەلەرىمەن مۇقيات تانىستى، ايتقان ۇسىنىس-تىلەكتەرىن زەيىن قويا تىڭدادى.

ەڭ وزەكتىسى -  شالعاي اۋىلدارعا حالىقتى قونىستاندىرۋ. اسىرەسە، جاس وتباسىلاردى جۇمىسپەن قامتىپ، اۋىلعا تۇراقتاتۋ ءۇشىن باسپانا ماسەلەسىنىڭ تولىق شەشىلمەي كەلە جاتقانى قىنجىلتادى. «كاسىپكەرلىك پەن اۋىلشارۋاشىلىعىن وركەندەتۋ ءۇشىن دە بوگەتتەر بار» دەيدى كۇرشىمدىكتەر .

قابدوللا قىرىقبايەۆ، كۇرشىم اۋىلىنىڭ تۇرعىنى:

-  راسىن ايتايىق، وڭىردەگى اۋىل شارۋاشىلىعىنىڭ دامۋىنا كەدەرگى بولىپ وتىرعان نەسيە ماسەلەسى. بانكتەردىڭ كەپىلدىگى قيىن. ماسەلەن وسى اۋداندا 5 ميلليون تەڭگە نەسيە الايىن دەسەڭ، وسى كۇرشىم اۋىلىنىڭ ەكى ءۇيىن كەپىلدىككە قويۋ كەرەك.

دەسە دە سوڭعى جىلدارى مەملەكەت قامقورلىعىنىڭ ارقاسىندا تىندىرىمدى ىستەر كوبەيىپ كەلەدى. بىرتىندەپ اۋىز سۋ ماسەلەسى شەشىمىن تاۋىپ، مەكتەپ، بالاباقشا، اۋرۋحانا سىندى الەۋمەتتىك ماڭىزى بار نىسانداردىڭ قۇرىلىستارى جۇرگىزىلىپ جاتىر. ال ءتۇيىنى شەشىلمەگەن تۇيتكىلدەرىن تۇرعىندار پارلامەنت دەپۋتاتىنا تىكەلەي جولدادى.

نۇرتاي سابيليانوۆ، ق ر پارلامەنتى ءماجىلىسىنىڭ دەپۋتاتى:

-  شەكارالىق اۋدانداردى، شالعاي اۋىلداردى ارالاپ، حالىقپەن كەزدەسۋ وتكىزدىك. تۇرعىندار تاراپىنان تۇرعىن ءۇي سالۋ، شاعىن نەسيە بەرۋ، كاسىپكەرلىكتى قولداۋ، سونداي-اق جولداردى جوندەۋ، اۋىلداعى ينفراقۇرىلىمدى دامىتۋ ماسەلەلەرى كوتەرىلدى. ەگەر قىتايمەن شەكارالاس اۋدانداردىڭ اۋىلدارىندا حالىقتى تۇراقتاندىرا الماساق مۇنىڭ سوڭى كۇردەلى جاعدايدى ودان سايىن كوبەيتەرى بەلگىلى. سوندىقتان، ءبىرىنشى كەزەكتە ولاردىڭ تالاپ- تىلەكتەرىنىڭ ورىندالۋىنا كۇش سالۋىمىز كەرەك.

ءماجىلىس دەپۋتاتى جۇرتتىڭ جايىن جاقسى تۇسىنگەندىگىن وسى تۇرعىداعى ويىمەن ءبولىسىپ قانا قويماي، الداعى ۋاقىتتا اۋىلدىڭ دامۋىنا سەرىپن بەرەتىن باعدارلامالاردىڭ ورىندالۋى ءۇشىن قاجەتتى شارالار قولدانىلاتىندىعىن ايتتى.

اۆتور: ءساتجان قاسىمجان ۇلى، استانا قالاسى.