12:29, 21 - شىلدە 2014 | GMT +5
قىرعىزستان پرەمەر- ءمينيسترى وشتاعى نۇرسۇلتان نازاربايەۆ اتىنداعى مەكتەپتىڭ قۇرىلىس قارقىنىن تەكسەردى
استانا. قازاقپارات - قىرعىزستان پرەمەر- ءمينيسترى جوومارت وتاربايەۆ وشتا سالىنىپ جاتقان نۇرسۇلتان نازاربايەۆ اتىنداعى مەكتەپتىڭ قۇرىلىس قارقىنىن تەكسەردى، دەپ جازادى قىر تاگ اگەنتتىگى.
«جۇمىس ساپارى بارىسىندا پرەمەر- مينيستر جوومارت وتاربايەۆ وش قالاسىنىڭ مەرى ايمامات قادىربايەۆتىڭ قاتىسۋىمەن وش وبلىسى قاراسۋ اۋدانىندا ىرگەسى قالاناتىن ن. نازاربايەۆ اتىنداعى جاڭا مەكتەپتىڭ قۇرىلىس ورنىمەن جانە جوبامەن تانىستى» ، - دەپ حابارلادى باسپا ءسوز قىزمەتىنەن.
ساۋلەت جانە قۇرىلىس مەملەكەتتىك اگەنتتىك باسشىسى تۇردىبەك مامبەتوۆتىڭ سوزىنە قاراعاندا، بۇل مەكتەپتىڭ قۇرىلىسى ءۇشىن رەسپۋبليكالىق بيۋدجەتتەن 150 ميلليون سوم قاراستىرىلعان. قۇرىلىس مەرزىمى 8 ايدى قۇراماق.
مەكتەپ 30 وقىتۋ سىنىبىنا ارنالعان. كىتاپحانا، اسحانا، سپورت زالى بار. قۇرىلىس ينفراقۇرىلىمىنا سونداي- اق قازاندىق پەن جاڭعىرتىلعان سۋتاراتقىش جەلىسى كىرەدى.
