الماتى پوليتسياسى جول اپاتىنىڭ سەبەپكەرىن ۇستاۋعا كومەكتەسكەن بويجەتكەندى ماراپاتتادى

الماتى. قازاقپارات - الماتى پوليتسياسى جاياۋ جۇرگىنشىلەردى مەرتىكتىرىپ، وقيعا ورنىنان سىتىلىپ كەتپەك بولعان سالىقشىنى ۇستاۋعا سەپتەسكەن بويجەتكەندى ماراپاتتادى.

بۇل تۋرالى قالالىق ءى ءى د باسپا ءسوز قىزمەتىنەن حابارلادى.

تاحمينا شاحيماردانوۆانى ءى ءى د باسشىلىعى، جەكە قۇرامى، قالالىق ارداگەرلەر كەڭەسى ماراپاتتادى.

«بويجەتكەننىڭ ازاماتتىق بەلسەندىلىگىنىڭ ارقاسىندا جول اپاتىنا سەبەپكەر بولعان ادام ۇستالدى. بۇل بارلىق ازاماتتارعا ساباق بولارى ءسوزسىز. جۇرگىزۋشىنىڭ ماس كۇيىندە كولىك ايداعانى بەلگىلى بولدى. دەمەك ول قوعام ءۇشىن ۇلكەن قاۋىپ تۋعىزدى»، - دەدى ءى ءى د باسشىسىنىڭ ورىنباسارى ءىزباسار بەكتۇروۆ.

ءوز كەزەگىندە تاحمينا قيىن جاعدايعا تۇسكەن ادامدارعا كومەك قولىن سوزۋعا ءاردايىم ءازىر ەكەندىگىن جەتكىزدى. بويجەتكەن زارداپ شەككەن جاندارمەن تىعىز بايلانىستا ەكەن.

ونىڭ ايتۋىنشا، قازىر اناسى مەن بالاسى جازىلىپ كەلەدى.

ەستەرىڭىزگە سالا كەتەيىك، وسىدان ءبىر اي بۇرىن جۇكتىلىكتىڭ 9- ايىنداعى كەلىنشەكتى 3 جاسار بالاسىمەن قوسا «لەكسۋس» كولىگى الماتى كوشەلەرىنىڭ بىرىندە قاعىپ كەتكەن ەدى.

كەيىن بەلگىلى بولعانداي، ەكى ادامدى مەرتىكتىرگەن ۇيعىر اۋداندىق سالىق باسقارماسىنىڭ باسشىسى باقىت قۇرمانوۆ وقيعا ورنىنان ءىزىن سۋىتپاقشى بولعان. سول كەزدە جولدان ءوتىپ بارا جاتقان تاحمينا شاحيماردانوۆا ءوزىنىڭ كولىگىمەن سالىقشىنىڭ جولىن بوگەپ، پوليتسيا شاقىرتقان ەدى.

اۆتور: گۇلميرا ءعوسمانالي