مالازيالىق اۋە كومپانياسىنىڭ بولاشاعى بۇلىڭعىر
اۋە كەمەسىنىڭ اپاتى باتىس، ۋكراينا جانە رەسەي اراسىنداعى قاتىناستاردى ۋشىقتىرۋى مۇمكىن دەگەن كۇدىكپەن سول كۇنى كوپتەگەن ازيالىق بيرجالار تومەندەۋمەن اياقتالدى.
دەگەنمەن، «مالازيالىق اۋە جەلىلەرى» ءۇشىن بۇل اپات ءبىر جىلدىڭ ىشىندە ەكىنشى بولىپ تىركەلدى. وسىنىڭ الدىندا ناۋرىزدا MH370 رەيسى جوعالىپ كەتكەن ەدى جانە ونىڭ تاعدىرى وسى كۇنگە دەيىن بەلگىسىز كۇيىندە قالدى.
وسىدان كەيىن كومپانيانىڭ كۇيرەۋى مۇمكىندىگى جايىندا كوپ پىكىرلەر ايتىلۋدا.
«بۇنى كەزدەيسوقتىق دەگەننىڭ وزىندە، ۇلتتىق اۋە كومپانيالاردىڭ تاريحىندا بىرنەشە ايدىڭ ىشىندە بىردەن ەكى جالپاق فيۋزەلياجدى اۋە كەمەسىنەن ايىرىلۋ وقيعاسى ەشقاشان بولعان ەمەس. بۇل تۇرعىدا ۇكىمەت تاراپىنان ماقساتتى جانە سالماقتى قولداۋ قاجەتتىلىك ەتۋدە»، - دەيدى Malaysia Airlines كومپانياسىمەن جۇمىس ىستەيتىن DVB بانكتىڭ وكىلى بەرتران گرابوۆسكي.
كومپانيا بىرنەشە جىلدان بەرى شىعىندى بولىپ كەلگەن، ال سوڭعى 9 ايدا ونىڭ نارىقتىق باعاسى 40 پايىزدان استام دەڭگەيگە تومەندەدى.
ساراپشىلاردىڭ پايىمىنشا، سوڭعى اپاتتان كەيىن كومپانيانىڭ بەدەلى ءتۇسىپ وتىر. وسى ورايدا وسى وقيعالار كومپانيا ءۇشىن اۋىر تيەتىنى ءسوزسىز.
Malaysia Airlines كومپانياسىنا تيەسىلى Boeing-777 كييەۆپەن 16:20 (17:20 م س ك) شاماسىندا بايلانىسىن توقتاتتى. كەيىن ونىڭ ۋكراينانىڭ دونەتسك وبلىسىنا قاراستى گرابوۆو اۋىلىنىڭ ماڭىندا اپاتقا ۇشىراعانى بەلگىلى بولعان. سالدارىنان بورتتا بولعان 298 ادام قازا تاپتى.
اۆتور: رۋسلان عابباسوۆ
