پارا الدى دەگەن ايىپ تاعىلعان بۇرىنعى اگەنتتىك ءتوراعاسى مۇرات وسپانوۆ قاشۋعا ارەكەت جاساعان

استانا. قازاقپارات - قارجى پوليتسياسى اگەنتتىگى اسا ءىرى كولەمدە پارا الدى دەگەن ايىپ تاعىلىپ وتىرعان تابيعي مونوپوليالاردى رەتتەۋ اگەنتتىگىنىڭ بۇرىنعى ءتوراعاسى مۇرات وسپانوۆتىڭ قورعاۋشىسى ح. ايتقاليەۆانىڭ بۇقارالىق اقپارات قۇرالدارى ارقىلى تاراتقان مالىمەتى شىندىققا سايكەس كەلمەيتىندىگىن حابارلايدى.

وسپانوۆ 2014 - جىلعى 1 - شىلدەدە قارجى پوليسياسى اگەنتتىگىندە جاۋاپ بەرۋدەن كەيىن ۇستالعان بولاتىن.

ونى ۋاقىتشا ۇستاۋ اباقتىسىنا توعىتقان كەزدە سوت- مەديسينالىق ساراپتاماسى جۇرگىزىلگەن. ول بويىنشا وسپانوۆتا دەنە جاراقاتىنىڭ جوقتىعى انىقتالعان.

كەلەسى كۇنى، 2014 - جىلعى 2 - شىلدەدە 10 ساعات 30 مينۋتتاردىڭ شاماسىندا وسپانوۆتى ۋاقىتشا ۇستاۋ اباقتىسىنان اگەنتتىك عيماراتىنا الىپ كەلۋ كەزىندە، ول ءوزىن ناشار سەزىنۋىنە بايلانىستى اۆتوماشينانى توقتاتۋدى سۇراعان.

بىردەن ەسىكتى اشىپ جانە اۆتوموبيل سالونىنان جۇگىرىپ شىعىپ، وسپانوۆ قاشۋعا ارەكەت جاساعان. اگەنتتىك قىزمەتكەرلەرى اۆتوماشينادان 15 مەتر جەردە ونى ۇستاپ، بۇل ارەكەتىنە توسقاۋىل قويدى.

اگەنتتىك قىزمەتكەرلەرىمەن ۇستالعان وسپانوۆ ولارعا قارسىلىق بىلدىرگەن، ناتيجەسىندە ونىڭ ءوزى جانە قارجى پوليسياسى قىزمەتكەرى جەرگە قۇلاپ، دەنە جاراقاتىن العان.

بۇل فاكت بىردەن اگەنتتىكتىڭ ارىزدار مەن اقپاراتتى ەسەپكە الۋ جۋرنالىنا تىركەلگەن، وسپانوۆ پەن ونى قاراۋىلداعان قىزمەتكەرلەرگە قاتىستى دەنە جاراقاتىن انىقتاۋ ماقساتىندا سوت- مەديتسينالىق ساراپتاما تاعايىندالعان.

ساراپتاما قورىتىندىسىمەن وسپانوۆ پەن ونى ۇستاعان قىزمەتكەردىڭ دەنەلەرىندە كوگەرگەن ىسىكتەر مەن جارا تۇرىندەگى جاراقات انىقتالعان.

وسى كۇنى وسپانوۆ ءوزى جالداعان ادۆوكاتتىڭ كوزىنشە اتالعان ءمان- جايلاردى تولىق مويىندادى.

وعان قوسا، كەلەسى كۇنى - 2014 - جىلعى 3 - شىلدەدە قاماۋعا الۋدى سوتتا سانكسيالاۋ كەزىندە، پروكۋرور، ادۆوكات جانە ءوز تۋىسقاندارىنىڭ كوزىنشە وسپانوۆ سوتقا قارجى پوليسياسى قىزمەتكەرلەرىنە ەشقانداي نارازىلىعىنىڭ جوق ەكەندىگىن جانە بۇل جايتتىڭ ورىن الۋىنا ءوزى سەبەپ بولعاندىعىن ايتقان.

«وسىعان وراي قاشۋعا بايلانىستى ورىن العان جاعدايدان 2 اپتا وتكەن سوڭ وسپانوۆتىڭ قورعاۋشىسىنىڭ بۇقارالىق اقپارات قۇرالدارىنا بەرگەن قارجى پوليسياسى قىزمەتكەرلەرىنىڭ زاڭسىز ءىس- ارەكەتىنە قاتىستى تۇسىندىرمەلەرى ورىنسىز بولىپ كورىنەدى. سەبەبى وسپانوۆتىڭ ءوزى بۇگىنگى كۇنگە دەيىن بۇنداي ارىزدارمەن جۇگىنبەگەن» ، - دەلىنگەن حابارلامادا.