بوتەن نارەستەنى ەلدەن الىپ كەتپەك بولعان ەرلى- زايىپتىلار تۇتقىنعا الىندى

 استانا. قازاقپارات -  يسپاندىق ەرلى- زايىپتىلار كولۋمبيادا بوتەن نارەستەنى ەلدەن الىپ كەتپەك بولعاندىقتارى ءۇشىن تۇتقىنعا الىندى. ولارعا بالانى ونىڭ اتا- اناسىنان ساتىپ العان دەگەن كۇدىك كەلتىرىلۋدە، دەپ حابارلادى شەتەلدىك ب ا ق.

 45 جانە 42 جاستاعى يسپانيا ازاماتتارى بوگوتا حالىقارالىق اۋەجايىنان مادريدكە جاڭا تۋعان نارەستەمەن ۇشىپ كەتپەك بولعان. جەرگىلىكتى بيلىك مالىمەتتەرىنە قاراعاندا، ولار نارەستەنى ساتىپ الۋ ءۇشىن ونىڭ اتا- انالارىنا 18 مىڭ ەۋرو جانە مامىلەگە دەلدال بولعان دارىگەرگە 1,2 مىڭ ەۋرو تولەگەن. ەندىگى ۋاقىتتا يسپاندىقتارعا، سونىمەن بىرگە جاڭا تۋعان نارەستەلەرىن عالامتور ارقىلى ساۋدالاعان ەرلى- زايىپتىلارعا بالا ساۋدالاۋ ايىبى تاعىلماق.

ايتا كەتەرلىگى، 2013 - جىلى كولۋمبيانىڭ كوشى- قون بيلىگى جالعان قۇجاتتارمەن شەتەل اسىرىلماق بولعان 48 سابيگە اراشا تۇسكەن ەدى. ال بيىل ولار ءدال وسىنداي 36 وقيعانىڭ ورىن الۋىنا جول بەرمەدى.

اۆتور: مارلان جيەمباي