09:13, 19 - شىلدە 2014 | GMT +5
وڭتۇستىك كورەيادا تەڭىز بالشىعى فەستيۆالى وتۋدە
استانا. قازاقپارات - وڭتۇستىك كورەيانىڭ پورين قالاسىندا تەڭىز بالشىعى فەستيۆالى وتۋدە، دەپ جازادى 24.kz.
بۇل شاھار ەل استاناسى سەۋلدەن 190 شاقىرىم قاشىقتىقتا ورنالاسقان. ءبىرىن- ءبىرى لاي بالشىقپەن اتقىلايتىن شارا بيىل 17- رەت وتكىزىلىپ وتىر. بىلتىر فەستيۆالگە 3 ميلليوننان استام ادام قاتىسقان. ۇيىمداستىرۋشىلار بيىل دا سونشا ساياحاتشى كەلەدى دەپ كۇتۋدە.
تەڭىز بالشىعى ادام تەرىسى ءۇشىن پايدالى جانە ءتۇرلى اۋرۋلارعا قارسى ەم رەتىندە قاجەتتى مينەرالدارعا باي. سوندىقتان بۇل شاراعا ەرىككەننىڭ ەرمەگى دەپ قاراماعان ءجون. فەستيۆال اياسىندا بىرنەشە شارا قامتىلعان. ولاردىڭ اراسىندا بالشىقپەن جۇگىرۋ، بالشىقتا كۇرەسۋ، بالشىقتان مۇسىندەر جاساۋ، بالشىق سىرعاناقتارىندا سىرعاناۋ، بالشىقپەن ماسساج جاساۋ جانە بي بيلەۋ بار. قىزىعى مول فەستيۆال 27- شىلدەگە دەيىن جالعاسادى.
