قىزىلقۇمداعى شەكارا بەكەتىنە جانقوجا باتىر ەسىمى بەرىلەدى
دەپ حابارلادى اۋدان اكىمدىگىنىڭ باسپا ءسوز قىزمەتىنەن.
كوميسسيا وتىرىسىنا ءتوراعالىق ەتكەن اۋدان اكىمى باحىت جاحانوۆ مەرەيتويدا اتقارىلاتىن ءىس- شارالار جوسپارىمەن تانىستىردى.
«بۇگىنگى كۇنى قىزىلقۇمداعى شەكارا بەكەتىنە جانقوجا باتىر ەسىمىن بەرۋ تۋرالى وبلىستىق ونوماستيكا كوميسسياسىنىڭ قورىتىندىسى شىقتى. بۇل جۇمىستاردى ورىنداۋدا جەرلەسىمىز، پارلامەنت ءماجىلىسىنىڭ دەپۋتاتى باقىتبەك سماعۇلدىڭ ەڭبەگىن اتاپ وتكىم كەلەدى» ، - دەدى اۋدان اكىمى.
سونىمەن قاتار، تورەتام كەنتىندەگى №269 ورتا مەكتەپكە دە باتىر ەسىمى بەرىلەتىن بولدى.
الداعى ۋاقىتتا وسى مەرەيتوي اياسىندا جازۋشى مولداحمەت قانازدىڭ دەرەكتى شىعارماسى مەن س. قوجاعۇلدىڭ «جانقوجا باتىر داستانى» ، ن. كوبەگەن ۇلىنىڭ «جانقوجا باتىر تۋرالى، تەرمە، ولەڭ- جىرلار جيناعى» شىعارىلاتىن بولادى. ال جازۋشى ءا. وسپانوۆتىڭ «ناركەسكەن» تريلوگياسى وقىرمانعا جول تارتتى.
مەرەيتويدا وبلىس ورتالىعىندا عىلىمي- تانىمدىق كونفەرەنتسيا وتكىزىلىپ، بابا رۋحىنا اس بەرىلەدى.
اۋدان اكىمدىگى باسپا ءسوز قىزمەتىنىڭ حابارلاۋىنشا، نەگىزگى شارالار قازالى اۋدانىنداعى جانقوجا باتىر اۋىلىندا وتكىزىلەدى.
اۋىلدى كوركەيتۋ، الەۋمەتتىك نىسانداردى كۇردەلى جوندەۋ جۇمىستارىنا بيۋدجەتتەن بارلىعى 600 ميلليون تەڭگەنىڭ ۇستىندە قارجى بولگەن. قازىرگى كۇنى اۋدان بويىنشا اباتتاندىرۋ جۇمىستارى قولعا الىنىپ، بيۋدجەتتەن بولىنگەن 56 ميلليون تەڭگەگە جانقوجا بابا كەسەنەسىن اباتتاندىرۋ، كوركەيتۋ جۇمىستارى جاسالىپ جاتىر.
مەرەيتوي الداعى قازان ايىنىڭ 10-12 - كۇندەرى وتەدى.
اۆتور: ەلۋباي اۋەزوۆ
