قازاقستان ۋكراينانىڭ اۋە كەڭىستىگىن پايدالانباۋ تۋرالى ەسكەرتتى

 استانا. قازاقپارات-  ق ر كولىك جانە كوممۋنيكاسيا مينيسترلىگى قازاقستاندىق جانە شەتەلدىك ترانزيتتىك اۋە كومپانيالارعا ۋكراينانىڭ اۋە كەڭىستىگىن پايدالانباۋ تۋرالى ەسكەرتتى.

 بۇل تۋرالى بۇگىن ق ر  ك ك م ازاماتتىق اۆياسيا كوميتەتى ءتوراعاسىنىڭ ورىنباسارى سەرىك مۇحتىبايەۆ ايتتى

«وزدەرىڭىز بىلەسىزدەر، ۋكراينانىڭ اۋە كەڭىستىگىندە مالايزيالىق اۋە كومپانياسىنىڭ ۇشاعى اپاتقا ۇشىرادى. قازىرگى كەزدە ۋكراينا تاراپىنان ارنايى كوميسسيا قۇرىلىپ، ءتيىستى قۇزىرلى ورگاندار تەرگەۋ امالدارىن جۇرگىزۋدە. ءبىز وسى اپات سالدارىنان قازا بولعانداردىڭ تۋعان- تۋىسقاندارىنا قايعىرىپ كوڭىل ايتامىز» ، - دەپ توقتالعان ول: «ۋكراينا اۋە كەڭىستىگى ارقىلى قازاقستاندىق اۋە كومپانيالارىنىڭ ۇشۋى ماسەلەسىنە توقتالاتىن بولساق، كەشەگى اپاتتىڭ ناقتى سەبەپتەرى انىقتالعانشا قازىرگى كەزدە ءبىز وسى ەلدىڭ اۋە كەڭىستىگىن پايدالانباۋ تۋرالى ەسكەرتۋلەر جاسادىق. كەشە «ەير استانا» ۋكراينا اۋماعى ارقىلى ۇشۋدى توقتاتتى. وسى ساتتە ءتيىستى كونسۋلتاتسيالار جۇرگىزىلىپ جاتىر» ، - دەپ اتاپ ءوتتى.

ونىڭ سوزىنە قاراعاندا، جاقىن ارادا ەۋروپالىق قاداعالاۋ، ۋكراينانىڭ اۆياسيالىق بيلىگى، حالىقارالىق اۆياسيالىق كوميتەتى تاراپىنان اتالعان ەلدىڭ اۋە كەڭىستىگىن پايدالانۋ مۇمكىندىگى تۇرعىسىندا شەشىمىن بەرەدى.

ونىڭ ايتۋىنشا، ۋكراينا اۋماعى ارقىلى قازاقستاندىق اۋە كومپانيالارى ىشىندە «ەير استانا» عانا ۇشقان جانە كەيبىر كەزدەردە چارتەرلىك رەيستەر جاسالىپ وتىرعان.

 قازاقستاندىق Air Astana اۆياكومپانياسى رەسەي مەن ۋكراينا شەكاراسىنداعى قايعىلى اۆيااپاتقا بايلانىستى ءوزىنىڭ الماتىدان كيەۆكە ۇشاتىن رەيسىن 24 ساعاتقا كەيىنگە قالدىردى.

 «بۇل وقيعانىڭ ءمان- جايى انىقتالعانعا دەيىن «ەير استانانىڭ» ك س 401/402 الماتى- كيەۆ- الماتى رەيستەرى 2014 - جىلعى 18 - شىلدەدەن باستاپ، 24 ساعات مەرزىمگە توقتاتىلدى» ، - دەلىنگەن حابارلامادا.

كومپانيادان حابارلاعانداي، كەستەدەگى بارلىق وزگەرىستەر تۋرالى جولاۋشىلار قوسىمشا حاباردار ەتىلەدى.

 «ەگەر رەيستى ورىنداۋ مۇمكىن بولماسا نەمەسە جولاۋشىلار ۇشۋدان باس تارتسا، قايتا برونداۋ نەمەسە اقشا قاراجاتتارىن قايتارۋ اۆيابيلەتتەر ساتاتىن اگەنتتىكتەردە نەمەسە «ەير استانانىڭ» برونداۋ جانە اقپارات ورتالىعىندا ەشقانداي كوميسسياسىز قايتارىلادى» ، - دەپ ءتۇسىندىردى باسپا ءسوز قىزمەتى.

 ەسكە سالا كەتەيىك، مالايزيالىق اۆياجەلىلەردىڭ Boeing 777 ۇشاعى ۋكراينا اۋماعىندا رەسەيلىك شەكاراعا تاياۋ ماڭدا اپاتقا ۇشىرادى. اۋە كەمەسىنىڭ بورتىندا 280 جولاۋشى، ەكيپاجدىڭ 15 مۇشەسى بولدى. ولاردىڭ ءبارى دە قازاعا ۇشىرادى. ب ا ق اپاتتىڭ اپاتقا ۇشىراۋىنا بايلانىستى اۋە كەمەسىن اتىپ تۇسىرگەن بولۋى مۇمكىن دەگەنگە دەيىن ءارتۇرلى قاراما- قايشى بولجامداردى جاريالاۋدا.