ورازا - ادام دەنساۋلىعى ءۇشىن قاۋىپتى دەپ سوعاتىندار شىقتى
ال ول ءوز كەزەگىندە ينسۋلت، ينفاركت، ءتىپتى، ونكولوگيالىق اۋرۋلارعا اكەپ سوعادى دەپ مالىمدەدى دەنساۋلىق ساقتاۋ مينيسترلىگىنىڭ شتاتتان تىس باس گاستروەنتەرولوگى روزا بەكتايەۆا "مەگاپوليسقا" بەرگەن سۇحباتىندا.
ونىڭ سوزىنشە، ورازانىڭ شارتتارى - تاڭنىڭ اتىسىنان كۇننىڭ باتىسىنا دەيىن ءىشىپ-جەمنەن باس تارتۋ - ادام اعزاسى ءۇشىن تىم اۋىر جۇك.
"كۇنى بويى سۋسىن ىشپەۋ - تىم ارتىق كەتۋ. كۇنى بويى تاماقتانباي، ءتۇن بولعاندا اس ءىشۋ دە مەديتسينالىق تۇرعىدان دۇرىس ەمەس"، - دەيدى ول.
دارىگەر، سونىمەن قاتار، اۋىزاشار بەرۋدى دە سىنادى. دارىگەر اۋىزاشاردى تاعام تولى داستارحان باسىنداعى تۇنگى وتىرىس دەپ تۇسىنەدى ەكەن.
تاماق تانۋ رەجيمنىڭ وسىلايشا كۇندە بۇزىلۋى اس قورىتۋ جۇيەسىنە، جۇرەك-قان تامىرلارى مەن جۇيكە جۇيەسىنە قاتەر توندىرەدى دەپ وتىر روزا بەكتايەۆا.
"دارىگەر رەتىندە مەنى، قايتالاپ ايتايىن، كۇنى بويى سۋسىن ىشۋدەن باس تارتۋ قاتتى الاڭداتادى. ءبىراق بۇل جەردە نە ىستەۋگە بولاتىنىن مەن بىلمەيمىن. مۇمكىن مەديتسينا ماماندارى مەن مۇسىلمان ءدىنى وكىلدەرى بىرىگە وتىرىپ، وسى ماسەلەنى قايتا قارايتىن ۋاقىت كەلگەن شىعار؟! ويتكەنى مەن و باستان سولاي جازىلدى دەپ ويلامايمىن. مۇمكىن، بىرەۋ قاسيەتتى جازبانى دۇرىس تۇسىندىرمەگەن بولار، بالكىم؟!"، - دەيدى روزا بەكتايەۆا.
«ورازا - ادام دەنساۋلىعى ءۇشىن قاۋىپتى» ەمەس، روزا مۇسىلماندار ءۇشىن قاۋىپتى!!!
دەنساۋلىق ساقتاۋ مينيسترلىگى باس گاستروەنتەرولوگى روزا بەكتايەۆانىڭ دەنساۋلىعى دۇرىس پا؟ ەسى دۇرىس ادام وسىلاي وتتاي ما؟ "مەگاپوليستىڭ" اننا ۆىپريتسكيح دەگەن ءتىلشىسى تۇمسىعىنان سۇيرەگەنگە باستان كەتكەن باس گاستروەنتەرولوگ ءتىپتى، قۇرانعا كۇمان كەلتىرەدى: «...مەديتسينا ماماندارى مەن مۇسىلمان ءدىنى وكىلدەرى بىرىگە وتىرىپ، وسى ماسەلەنى (ورازا ۇستاۋدى ق. ي.) قايتا قارايتىن ۋاقىت كەلگەن شىعار؟! ويتكەنى مەن و باستان سولاي جازىلدى دەپ ويلامايمىن. مۇمكىن، بىرەۋ قاسيەتتى جازبانى دۇرىس تۇسىندىرمەگەن بولار، بالكىم؟!" - دەپ سوعادى قۇدايدان قورىقپاي... بۇل ورازانىڭ ەرەجەسىنەن ماقۇرىم ساۋاتسىزدار ءتىلشى اننا ۆىپريتسكيح پەن باس گاستروەنتەرولوگ روزا بەكەتايەۆاعا ايتارىمىز، ورازانى دەنساۋلىعى دۇرىس ەمەس ادامدار ۇستاماۋىنا ورازا ۇستاۋ ەرەجەسىنىڭ ءوزى رۇقسات بەرەدى...
ال «يسلام شارتارى بويىنشا كۇنى بويى كەز-كەلگەن سۇيىقتىق ىشۋگە بولمايدى، بۇل مەنىڭشە، ايقىن شەكتەن شىعۋ...» - دەپ سايرايدى ول تاعى دا... ال يسلامدا كۇننىڭ ىستىعى شىلدەدە كەلگەن قاسيەتتى ورازانى وتىز كۇن ۇستاپ، قۇدايعا قۇلشىلىق ەتكەن مۇسىلماندار جانناتقا بارادى دەپ ايتىلادى. سوندا بۇل روزا بەكتايەۆا قۇداي ءسوزى قۇراندى «تۇزەپ» يسلام قاعيدالارىن «رەداكسيالاماقشى» ما؟! (استاپىراللا! اللا ساقتاسىن!)
كەزىندە ۇلتتىق مۇددەمىزگە، تىلىمىزگە، دىلىمىزگە دە تالاي قارسى شىققان «مەگاپوليست» گازەتىنىڭ ەندى دىنىمىزگە تەرىس پيعىلداعى ماقالاسى «ۆوزموجنو، ناستالو ۆرەميا پەرەسموترەت نورمۋ وتكازا وت ۆودى ۆو ۆرەميا ورازى» - دەپ اتالادى. شاماسى، ءتىلشى اننا ۆىپريتسكيحتىڭ مۇرىندىق سالىپ مۇرنىنان جەتەكتەۋى بويىنشا، بۇلار ون ەكى ايدىڭ سۇلتانى - قاسيەتتى ورازانىڭ تالاپتارىن وزدەرىنىڭ سۋ ءىشىپ، جەڭىل-جەلپى تاماق جەپ جۇرە بەرەتىن حريستياندىق «ورازالارىنا» اپارىپ قوسا سالماقشى عوي دەيمىن... ايتپەسە، باس گاستروەنتەرولوگتىڭ باس تەرىسىنە قاراساڭ، ورازاعا قارسى شىعاتىنداي... ەلدىڭ دەنساۋلىعىنان بۇرىن... ءوزىنىڭ دەنساۋلىعىن كوبىرەك ويلاعانى دۇرىس سياقتى...
بۇنداي ءدىني ارازدىق تۋدىراتىن سوراقىلىققا قازاقستاننىڭ ءدىني باسقارماسى مەن ق ر ءدىن اگەنتتىگى رەسمي جاۋابىن بەرىپ، قارسىلىعىن كورسەتۋى ءتيىس دەپ سانايمىز!
دەنساۋلىق ساقتاۋ مينيسترلىگىنىڭ شتاتتان تىس باس گاستروەنتەرولوگىن جۇيكە اۋرۋلارى ەمحاناسىنا كەزەكسىز جىبەرۋ كەرەك! دەنساۋلىق مينيسترىنەن وسىنى سۇرايمىز! ياعني، روزا بەكتايەۆا ايتقانداي: "ورازا - ادام دەنساۋلىعى ءۇشىن قاۋىپتى» ەمەس، روزا - مۇسىلماندار ءۇشىن قاۋىپتى!!!
قازىبەك يسا،
qazaquni.kz
