اتىراۋدا قانسورعىش ماسالار ءۇي قويانىن شاعىپ ولتىرگەن
اتىراۋدا ەل اۋزىندا ساسىق ساي دەپ اتالاتىن بۋلانۋ الاڭى بار. ول جەر ماسالاردىڭ باستى وشاعىنا اينالىپ تا قالدى، دەپ جازادى «اق جايىق» ايماقتىق باسىلىمى.
- بۇل جەردە، نەگىزىنەن، ماسالاردىڭ ءىرى قالالىق «culex pipiens» دەگەن ءتۇرى مەكەندەپ، كوبەيەدى. ەڭ قورقىنىشتىسى بۇل ەمەس. كەشە ەركىن قالاعا بارعانمىن، سول جەردە ماسانىڭ شاعۋىنان ءۇي قوياندارى ءولىپ قالعان. دامبى، راكۋش، كۋريلكين تۇرعىندارىنىڭ دا بەرەكەسى قاشقان. ول جەردە ماسانىڭ كوپتىگى سونداي، قارا بۇلت سياقتى قاپتايدى، - دەيدى ەنتومولوگ نازگۇل مەڭدىعازيەۆا.
ونىڭ ايتۋىنشا، بۇل ماسانىڭ تابيعي (تەڭىز) «aedes caspius» دەگەن ءتۇرى. ول تەك كۇن باتقاننان كەيىن عانا ەمەس، كۇنى بويىنا ادامداردىڭ مازاسىن كەتىرەدى.
- 7-12 شاقىرىم جەرگە دەيىن ۇشۋعا قابىلەتتى. بيىل سۋ تاسقىنىنان كوپ جەرگە سۋ جايىلىپ كەتكەن. سول جەرلەردە ماسالار كوبەيۋدە. وڭتۇستىك-شىعىستان سوققان جەل ولاردى ەلدى مەكەندەرگە قاراي قۋىپ اپارادى، ولار اتىراۋعا دا قاپتاپ كەلەدى، - دەپ جالعاستىردى ول.
بيىلعى جىلى اتىراۋ وبلىسىندا ماسالارمەن كۇرەس جۇمىستارىن جۇرگىزۋ تەندەرىن «AG disinfection services» ج ش س جەڭىپ العان ەدى. ج ش س ديرەكتورى جۇمان ساتىبالديەۆتىڭ ايتۋىنا قاراعاندا، ساسىقساي پەريمەترى بويىنشا ماسالاردىڭ كوبەيۋ وشاعى ءاردايىم ينسەكتيتسيدپەن ۋلانادى.
- بۇل جەر 24 شاقىرىم. ءبىر ۋلاعاندا بۇل جەرگە ەكى توننا ۋ شاشامىز. پرەپارات سۋمەن تارالادى جانە دەرناسىلدەر مەن ەرەسەك ماسالارعا اسەر ەتەتىن بولادى، - دەپ ءتۇسىندىردى ج. ساتىبالديەۆ.
«AG disinfection services» ج ش س ماسالار ءۇشىن ۋلى تۇمان شاشاتىن ەكى جەل گەنەراتورىمەن، تەرموگەنەراتورمەن، قولمەن قوسىلاتىن ءتۇتىن گەنەراتورلارىمەن، رەسەيلىك، گوللاندتىق جانە نەمىس ءوندىرىسىنىڭ پرەپاراتتارىمەن جابدىقتالعان.
- ءبىز ءۇشىن جۇمىس جوسپارى تەك وبلىس ورتالىعىنىڭ اۋماعىمەن عانا شەكتەلگەن، تيىسىنشە، قارجى تەك قالاعا عانا ءبولىندى. ال، بيىل ماسالار، كوبىنەسە، تەڭىز جاقتان كەلەدى. بۇگىندە اۋماقتى وڭدەۋ كەستەسىنەن اۋىتقىپ، ايىنا ءبىر رەت ۋلاۋدىڭ ورنىنا كۇن سايىن ۋلاۋعا شىعىپ ءجۇرمىز.
الايدا، كەزەكتى تەڭىز جەلى تابيعي ماسانىڭ جاڭا توبىن وزىمەن بىرگە الا كەلەدى. ۋلاۋعا قارجى بولىنبەگەن قالا ماڭىنداعى سەلولاردىڭ تۇرعىندارىنا وڭاي ءتيىپ جاتقان جوق، تيىسىنشە، ولارعا دەزينسەكسيالاۋ جۇمىستارى جۇرگىزىلمەيدى، - دەپ اتاپ ءوتتى ج. ساتىبالديەۆ.
