قىتايلىق بەزبۇيرەك اتا-انا ءوز بالالارىن ۆيدەو ويىن ءۇشىن ساتىپ جىبەرگەن

استانا. قازاقپارات - قىتايداعى ەرلى-زايىپتىلار ەكى بالاسىن ساتىپ جىبەرگەن.

ال ودان تۇسكەن اقشاعا اكەسى F2P-ويىندارىنا جۇمساعان، دەپ جازادى شەتەلدىك ب ا ق.

ا حۋەي مەن ا مەي 1990 - جىلى دۇنيەگە كەلگەن.

ولار بالالى بولۋدى جوسپارلاماعان سوڭ، تۇڭعىشى پايدا بولعاندا قۋانا قويماعان ەكەن.

اناسىنىڭ سوزىنە قاراعاندا، ا حۋەي بالاسىنا اقشا جۇمساۋدى قالاماي، ونى فۋجيان پروۆينسياسىنداعى بالالار ساۋداسىمەن اينالىساتىندارعا ساتۋدى ۇيعارعان. كەيىن ا مەي تاعى جۇكتى بولىپ قالعان. ونىڭ ازاماتتىق نەكەدەگى كۇيەۋى بۇل بالاسىن دا ساتىپ، اقشاسىنا F2P- ويىنىن ساتىپ العان. «ول ويىندارداعى زاتتى ساتىپ الۋدى ۇناتادى جانە كوپ ۋاقىت ينتەرنەت-كافەلەردە وتكىزەدى»، - دەيدى ايەلى.

وتباسىلىق جۇپتىڭ قىلمىسى تۋرالى ا حۋەيدىڭ اكەسى حابارلادى. قازىر بالالاردىڭ اتا-اناسى قاماۋعا الىنىپ، سوت شەشىمىن كۇتۋدە. قىتايدا بالالار ساۋداسىمەن اينالىسقاندارعا ءجيى ءولىم جازاسىن تاعايىندايتىن كورىنەدى.

وسىعان ۇقساس وقيعا ق ح ر-دا 2011 - جىلى بولعان. وندا قىتايلىق ەرلى-زايىپتىلار ونلاين- ويىندار ءۇشىن اقشا تولەمەك بولىپ ءۇش بالاسىن ساتقان. لي لين جانە لي دزيۋان بالالارىن 2009 - جىلدان ساتپاق بولعان. بەلگىلى بولعانداي، ولار زاڭعا قارسى ارەكەت جاساپ جاتقانىن بىلمەگەن. بالالارىڭدى ساعىنبايسىڭدار ما دەگەن ساۋالعا ولار: «ءبىز ولاردى وسىرگىمىز كەلمەيدى، كىشكەنە بولسىن اقشا الۋ ءۇشىن ولاردى ساتقىمىز كەلەدى»، - دەپ جاۋاپ بەرگەن ەكەن.