تەمىرتاۋدا بولات قورىتۋ ءوندىرىسى قالدىقتارىنان قوج- قيىرشىق تاسى الىنادى

قاراعاندى. قازاقپارات - قاراعاندى وبلىسىنىڭ تەمىرتاۋ قالاسىندا مونوقالالاردى دامىتۋ باعدارلاماسى بويىنشا بولات قورىتۋ قوجىن وڭدەۋ جوباسى جۇزەگە اسىرىلۋدا.

«ءبىز بولاتق ورىتۋ قوجىن وڭدەۋ جونىندەگى تاجىريبەلىك-ونەركاسىپتىك سۇرىپتاۋ قوندىرعىسىن ساتىپ الدىق. ەندى قالدىقتاردان قوج قيىرشىق تاسىن الامىز، ال وسى ماتەريالدار قۇرىلىسشىلار مەن جولشىلارعا وتە قاجەت»، - دەپ جوبانى تانىستىردى «الاۋجالىن» ج ش س ديرەكتورىنىڭ مىندەتىن اتقارۋشى شاكارىم تۇرسىنبەكوۆ ۇدەمەلى يندۋستريالىق- يننوۆاتسيالىق دامۋ مەملەكەتتىك باعدارلاماسى بويىنشا ۇيلەستىرۋ كەڭەسىنىڭ وتىرىسىندا.

 كاسپورىن مالىمەتتەرىنشە، جوبا قۇنى 140,6 ميلليون تەڭگە تۇرادى.

«قازىرگى كەزدە قوندىرعى وندىرىستىك قۋاتىن جاقسارتۋ جانە دايىن ونىمدەر كولەمىن ۇلعايتۋ ءۇشىن قوسىمشا جابدىقتالۋدا. ودان كەيىن جىلىنا 420 مىڭ توننا دايىن ونىمدەر شىعارامىز»، - دەدى ش. تۇرسىنبەكوۆ.

ونىڭ ايتۋىنشا، قوج قيىرشىق تاسىنىڭ تابيعي قيىرشىق تاستاردان تەحنيكالىق ارتىقشىلىقتارى بار.

وبلىس اكىمى نۇرمۇحامبەت ابدىبەكوۆ «ەكسپو-2017» قارساڭىندا بۇل جوبانىڭ وزەكتىلىگىن اتاپ ءوتتى.

«تەحنوگەندىك مينەرالدىق قالدىقتاردى وڭدەۋ - «جاسىل ەكونوميكاعا» جول. جۇمىس ورىندارى، سالىقتار، ينۆەستيتسيالار سياقتى الەۋمەتتىك-ەكونوميكالىق قۇرامداسىنان بولەك جوبا ەكولوگيالىق جاعدايدى جاقسارتۋعا، بوس جاتقان جەر ۋچاسكەلەرىن اينالىمعا ەنگىزۋگە مۇمكىندىك بەرەدى»، دەپ اتاپ كورسەتتى ءوڭىر باسشىسى.

جوبا ۇيلەستىرۋ كەڭەسى مۇشەلەرىنىڭ ماقۇلداۋىنا يە بولدى.

وتىرىستا سونداي-اق بالقاشتىڭ جەكە كاسىپكەرلەرىنىڭ گرانت بولۋگە وتىنىمدەرى قارالدى. سونىمەن بىرگە «جەزقازعان گاز قىزمەتى» ج ش س «گاز تولتىرۋ پۋنكتىنىڭ قۇرىلىسى» جوباسى ماقۇلدانىپ، جەتىسپەيتىن ينفراقۇرىلىمدى تارتۋعا مەملەكەتتىك قولداۋ كورسەتۋ ۇيعارىلدى.