قىتايدان كەلگەن دەلەگات: استانادا ءوتىپ جاتقان وليمپيادا فيزيكا الەمىندەگى جىلدىڭ باستى وقيعاسى
بۇل پىكىردى قازاقپارات تىلشىسىنە ق ح ر-دان كەلگەن دەلەگاتسيانىڭ جەتەكشىسى فان سەنگ ءبىلدىردى.
«ءبىز مىقتى قۇراممەن كەلدىك. ويتكەنى، استانادا ءوتىپ جاتقان وليمپيادا - بۇل جىلدىڭ ەڭ باستى وقيعاسى. مۇنداي حالىقارالىق ءىس-شاراعا ءبىز 500 مىڭعا جۋىق وقۋشىنىڭ اراسىنان ەڭ ۇزدىكتەرىن ىرىكتەپ الامىز. ولاردىڭ ءبىر بولىگى ازيالىق جانە وڭىرلىك جارىستارعا قاتىسسا، ەكىنشى توبى حالىقارالىق وليمپياداعا بارادى. توقەتەرىن ايتقاندا، قاتاڭ ىرىكتەۋدەن وتكىزەمىز. سوندىقتان دا اعىمداعى جىلى ادەتتەگىدەي ءبىزدىڭ مۇمكىنشىلىگىمىز جاقسى»، - دەيدى ف. سەنگ.
ونىڭ اتاپ وتۋىنشە، شارا وتە جاقسى ۇيىمداستىرىلعان ءارى قازاقستان استاناسى قاتىسۋشىلاردىڭ جادىندا ۇزاق ۋاقىت ساقتالاتىن بولادى. «جاتىن ورىندارمەن قاتار وليمپياداعى دايىندىق شارالارى دا الەمدىك دەڭگەيدە ەكەندىگىن اتاپ وتكىم كەلەدى. ءبىز نازاربايەۆ ۋنيۆەرسيتەتىندە بولدىق. ماعان، سونىمەن قاتار ءبىزدىڭ دەلەگاتسيانىڭ بارلىق مۇشەلەرىنە ۇنادى»، - دەدى ول.
قىتايلىق قوناق قازاقستاندىق مەكتەپ وقۋشىلارىنىڭ الەمدىك عىلىمي جارىستاردا زور جەتىستىكتەرگە جەتىپ جۇرگەندىگىن دە اتاپ ءوتتى. «قازاقستان ءوز ناتيجەلەرىمەن از ۋاقىتتىڭ ىشىندە سەنىمگە يە بولدى. ەگەر، قاتەلەسپەسەم 2010-2013 - جىلدار ارالىعىندا سىزدەردىڭ كوماندالارىڭىز حالىقارالىق وليمپيادادا 3 التىن، 1 كۇمىس جانە 1 قولا جەڭىپ الدى. اعىمداعى جىلى دا سىزدەردىڭ وقۋشىلارىڭىز جۇلدەلى ورىنسىز قالمايدى دەپ ويلايمىن. وليمپيادا استانادا وتۋدە ءارى قازاقستاندىق بالالار تىڭعىلىقتى دايىندالعانىن بىلەمىز»، - دەدى قىتايلىق قوناق.
اۆتور: مارلان جيەمباي
