وڭىرلىك دامۋ مينيسترلىگى پايدالانىلماي جاتقان جەرلەردى انىقتاۋ جۇمىستارىن جالعاستىرۋدا
ناتيجەسىندە رەسپۋبليكا بويىنشا 11,4 ميلليون گەكتار پايدالانىلماي جاتقان جەرلەر انىقتالدى، دەپ حابارلايدى ق ر وڭىرلىك دامۋ مينيسترلىگىنىڭ باسپا ءسوز قىزمەتى.
وڭىرلىك دامۋ مينيسترلىگى جەر رەسۋرستارىن باسقارۋ كوميتەتىنىڭ (بۇدان ءارى - كوميتەت) اۋماقتىق جەر ينسپەكتسيالارىنىڭ جانە جەرگىلىكتى اتقارۋشى ورگانداردىڭ قابىلداعان شارالارى بويىنشا مەملەكەت مەنشىگىنە 7 ميلليون گەكتار جەر قايتارىلدى، ونىڭ ىشىندە اۋىل شارۋاشىلىعى اينالىمىنا 6,1 ميلليون گەكتار جەر ەنگىزىلدى، ولاردىڭ 3,9 ميلليون گەكتار جاڭا مەنشىك يەلەرىنە بەرۋ جولىمەن جۇرگىزىلدى.
سونىمەن قاتار، پايدالانىلماي جاتقان جەرلەردى انىقتاۋ جانە ولاردى اينالىمعا ەنگىزۋ جۇمىستارى جالعاستىرىلۋدا. اتاپ ايتار بولساق، كوميتەت 2012-2013 - جىلدارى 61,2 ميلليون گەكتار اۋىل شارۋاشىلىعى القاپتارىنا تۇگەندەۋ جۇمىستارىن جۇرگىزدى. اعىمداعى جىلى 30,6 ميلليون گەكتار جەردىڭ 3 جىلدىق كەزەڭىنىڭ قورىتىندىسى اياقتالادى. قازىرگى ۋاقىتتا بارلىق وڭىرلەردە دالا جۇمىستارى اياقتالىپ، دەرەكتەردى كامەرالدىق وڭدەۋ باستالدى.
2012 - جىلى جۇرگىزىلگەن جەكە تۇرعىن ءۇي قۇرىلىسى ءۇشىن بەرىلگەن جەر تەلىمدەرىن تۇگەندەۋ جۇمىستارىنىڭ ناتيجەسىندە 54,8 مىڭ جەر ۋچاسكەسىنىڭ پايدالانىلماي جاتقانى انىقتالدى، قازىرگى ۋاقىتتا ونىڭ 20 مىڭى مەملەكەت مەنشىگىنە قايتارىلدى.
سونداي- اق، يەسىز جىلجىمايتىن مۇلىك رەتىندە 1,7 مىڭ جەر تەلىمى ەسەپتە تۇر، ونىڭ ىشىندە وڭتۇستىك قازاقستان وبلىسىندا - 0,7 مىڭ، باتىس قازاقستان وبلىسىندا - 0,4 مىڭ. جازباشا بەرىلگەن ەسكەرتۋلەردىڭ قورىتىندىسى بويىنشا جەردى پايدالانۋشىلار 17,4 مىڭ جەر تەلىمىن يگەرە باستادى، ال 6,9 مىڭ جەر ۋچاسكەسى بەكىتىلگەن ازاماتتىق قۇقىقتىق مامىلەلەر بويىنشا باسقا تۇلعالارعا اۋىستى.
8,2 مىڭ يگەرىلمەگەن جەر ۋچاسكەلەرى قاتاڭ ەسەپتە تۇر، ولار بويىنشا ءالى تالاپ قويۋ جۇمىستارى جۇرگىزىلۋدە.
