ەلباسى جان- كلود يۋنكەردى ەۋروكوميسسيا ءتوراعاسى لاۋازىمىنا سايلانۋىمەن قۇتتىقتادى
بۇل تۋرالى اقوردانىڭ باسپا ءسوز قىزمەتىنەن حابارلادى.
جەدەلحاتتا نۇرسۇلتان نازاربايەۆ قازاقستان حالقى جانە جەكە ءوز اتىنان ج.-ك. يۋنكەردى ەۋروپالىق كوميسسيانىڭ ءتوراعاسى لاۋازىمىنا سايلانۋىمەن قۇتتىقتاعان.
قازاقستان پرەزيدەنتى ليۋكسەمبۋرگ پرەمەر-ءمينيسترى قىزمەتىندەگى جانە ەۋروپالىق توپتاعى باسشىلىعى كەزىندە جيناعان ج.-ك. يۋنكەردىڭ مول تاجىريبەسى، ەۋروپا ماسەلەلەرىنە اسا جەتىكتىگى وعان ەۋروپالىق وداقتىڭ ورنىقتى دامۋىنا زور ۇلەسىن قوسۋىنا سەپتىگىن تيگىزەدى دەپ سەنەتىنىن ايتادى.
«ءسىزدىڭ 2008 - جىلى استاناعا جانە مەنىڭ 2010 - جىلى بريۋسسەلگە جاساعان ساپارلارىمىز بارىسىندا ارامىزدا ورنىققان ءوزارا تۇسىنىستىك پەن سەنىمگە نەگىزدەلگەن سىندارلى ديالوگتى جالعاستىرۋعا ءازىر ەكەنىمدى بىلدىرەمىن. قازاقستان مەن ەۋروپالىق وداق اراسىنداعى قارىم-قاتىناستار كەڭەيتىلگەن ارىپتەستىك پەن ىنتىماقتاستىق تۋرالى جاڭا كەلىسىم اياسىندا جاڭا ساپالى دەڭگەيگە كوتەرىلەدى دەپ ءۇمىت ارتامىن»، - دەلىنگەن جەدەلحاتتا.
ج.-ك. يۋنكەرگە مەملەكەت باسشىسى زور دەنساۋلىق جانە تابىس، ال ەۋروپالىق وداققا بەيبىتشىلىك پەن باق-بەرەكە تىلەدى.
