تانىمال ادامدار قولى قالت ەتكەندە نەمەن شۇعىلدانادى؟

استانا. قازاقپارات - تانىمال ادامداردىڭ قولى قالت ەتكەندە نەمەن شۇعىلداناتىنى قاراپايىم حالىققا قىزىق. ونەر جۇلدىزارىنىڭ باسىم كوپشىلىگى جىلقى اسىراۋعا اۋەس بولسا، گۇل ەگىپ، كەستە تىگۋگە قىزىعاتىندارى دا جەتەرلىك. «جاس قازاقتىڭ» ءتىلشىسى ەل ونەرى مەن مادەنيەتىندەگى تانىمال تۇلعالاردىڭ بوس ۋاقىتىن قالاي جۇمسايتىنىن ءبىلىپ قايتقان ەدى.

نۇكەتاي مىشباەۆا، حالىق ءارتىسى:

- كىشكەنتايىمنان وتە شيراق ەدىم. وقۋعا تۇسەردە سپورتتى سەرىك ەتكەنىم دەنساۋلىعىمنىڭ بەرىك بولۋىنا اسەر ەتتى. پورفيري يۆانوۆتىڭ تاسىلىمەن ۇستىمە سۋىق سۋ قۇيۋ مەنىڭ سۇيىكتى ىستەرىمنىڭ ءبىرى. بۇل ءۇردىستى 60 جاسىما دەيىن جالعاستىرىپ كەلدىم. قازىر جاس ۇلعايعان سوڭ، سۋىق سۋدان باس تارتتىم. ونىڭ ورنىنا قىستىڭ كۇنى تاڭعى 6 دا، جازدا تاڭعى 7 دە تۇرىپ، ەكى ساعاتتاي تازا اۋادا سەرۋەندەپ جۇرەمىن. اراسىندا جەڭىل-جەلپى جاتتىعۋلار جاسايمىن. جالپى العاندا، تەاتردان بولەك، سپورتتى مەنىڭ ءحوببيىم دەۋگە بولادى.

سۇلتان قالي ۇلى، اقىن:

- بالا كەزىمنەن سۋرەت سالۋعا قۇشتار بولدىم. العاش رەت اعايىمنىڭ ىقپالىمەن ستاليننىڭ بەينەسىن قاعاز بەتىنە تۇسىرگەنىم ەسىمدە. باستاپقىدا بىردەن ستالينگە ۇقساي قويمادى. جىرتىپ تاستاپ قايتا-قايتا سالامىن. كەيىن بىرتىندەپ ۇقساي باستاعانىن بايقادىم. سودان باستاپي سۋرەت سالۋ-حوببيىمە اينالىپ، قولىمنان قارىنداش تۇسپەيتىن بولدى. كەيدە كىتاپتان قاراپ سالسام، كەيدە ءوز ويىمداعى بەينەنى بوياۋمەن قاعازعا تۇسىرەمىن. كوبىنەسە سۋرەتتى پورترەت تۇرىندە جانە قىرىنان كەسكىندەگەن ۇنايدى. ماسەلەن، مۇقاعالي ماقاتايەۆ، ءشامشى قالداياقوۆ، انۋاربەك بايجانبايەۆ، ءامىرحان تەلعوزيەۆ، وتەجان نۇرعاليەۆ سىندى بەلگىلى تۇلعالاردىڭ سۋرەتى سالىنعان قويىن داپتەر ءالى بار وزىمدە. كەزىندە پلاستالين دەگەن شىقتى عوي. مەكتەپتە وقىپ جۇرگەنىمدە سول پلاستاليننەن ساكەن سەيفۋلليننىڭ، بەيىمبەت مايليننىڭ كەسكىنىن، سونداي-اق ماكسيم گوركيدىڭ تاياق ۇستاپ تۇرعان بەينەسىن جاساعانىم بار.

ەرماحان ىبىرايىموۆ، سيدنەي وليمپياداسىنىڭ چەمپيونى:

- 2001 - جىلدان بەرى ءار ءتۇرلى تارەلكەلەردى جيناۋ حوببيىمە اينالدى. بۇگىندە جينالعان تارەلكەمنىڭ سانى ەلۋدەن اسىپ جىعىلادى. ونىڭ ىشىندە التىننان جاسالعانى دا بار. كەز كەلگەن ەلگە ساپارعا شىقسام، ەرەكشە كوزگە تۇسكەن تارەلكەنى الىپ قايتامىن. «ەر قاناتى - ات» دەگەندەي، اتقا مىنەتىن ونەرىم دە بار. سونىمەن قاتار، ۆەلوسيپەدپەن جۇرگەندى ءجون كورەمىن. قالانىڭ انا شەتى مەن مىنا شەتىنە ۆەلوسيپەدپەن قاتىنايمىن.

باعدات ساميدەنوۆا، ءانشى:

-  مەنىڭ حوببيىم - كىتاپ وقۋ ەدى. اسىرەسە، پوەزياعا بۇيرەگىم بۇرىپ تۇراتىن. مەكتەپتە جۇرگەندە كىتاپتى جاستانىپ وقىدىم. سونداي-اق، كيىم تىگۋگە، ءتۇرلى كويلەكتى قولدان توقۋعا اۋەستىگىم بار. ءبىر كيىمدى ءبىر كۇندە تىگەتىن كەزدەر دە بولعان. بۇل ونەرىمدى قىزدارىما دا ۇيرەتتىم. قازىر كوبىنە جول ۇستىندە، گاسترولدىك ساپاردا جۇرەمىز. جولدىڭ ءوزى ادامدى قاجىتىپ جىبەرەدى ەكەن. ءبىراق كىتاپ وقۋعا ۋاقىت تابامىن.

دۋلىعا اقمولدا، اكتەر:

 
-  ونەردە جۇرگەن سوڭ، دومبىرا مەن گيتارادا ويناۋدى جات كورمەيمىن. ال بوس ۋاقىتتا دوستارىممەن شاحمات ويناۋ حوببيىمە اينالعان. سۋرەت سالعاندى دا جانىم قالايدى. جالپى، جىگىتكە جەتى ونەر دە از ەمەس پە؟! قولدان كەلسە، بارىنە ۇلگەرۋگە تىرىسامىن.

ساۋالنامانى جۇرگىزگەن نازىك تۇرتاي قىزى