ءپىتىر ساداقانى نە ۇشىن بەرەدى؟
سۇراق: ءپىتىر ساداقانى كىمنىڭ اتىنان بەرەدى؟
جاۋاپ: ءوز اتىنان جانە كىشكەنتاي بالالارىنىڭ اتىنان بەرەدى.
سۇراق: كىشكەنتاي بالاسىنىڭ ءپىتىر ساداقاسىن ءوز قاراجاتىنان بەرەدى مە الدە بالانىڭ قاراجاتىنان بەرۋ كەرەك پە؟
جاۋاپ: ەگەر بالانىڭ دەربەس قاراجاتى بولسا سودان، ايتپەسە اكەسى ءوز قاراجاتىنان بەرەدى.
سۇراق: ەر كىسى ايەلىنىڭ جانە ۇلكەن بالالارىنىڭ اتىنان ءپىتىر ساداقا بەرۋگە مىندەتتى مە؟
جاۋاپ: ەر كىسىنىڭ قامقورلىعىندا بولسا دا ايەلى جانە ۇلكەن بالالارى ءۇشىن ءپىتىر ساداقا بەرۋگە مىندەتتى ەمەس.
سۇراق: ءپىتىر ساداقاسىن قاي ۋاقىتتا بەرۋ ءۋاجىپ؟
جاۋاپ: ورازا ايت كۇنىنىڭ تاڭى اتقاننان باستاپ بەرۋ ءۋاجىپ بولادى. ەگەر كىسى ورازا ايت تاڭى اتقانشا قايتىس بولسا، ءپىتىر ساداقاسىن بەرۋ ءۋاجىپ ەمەس. سول سياقتى، تاڭ اتقان سوڭ مۇسىلمان بولعان كىسىگە نەمەسە تۋىلعان نارەستە اتىنان ءپىتىر ساداقا بەرۋ مىندەتتەلمەيدى.
سۇراق: ءپىتىر ساداقاسىن بەرۋدىڭ مۇستاحاب ۋاقىتى بار ما؟
جاۋاپ: ءيا، بار. ءپىتىر ساداقاسىن ايت كۇنى ايت نامازىنا شىقپاس بۇرىن بەرۋ قۇپ سانالادى.
سۇراق: ءپىتىر ساداقاسىن ورازا ايتتان بىرنەشە كۇن ىلگەرى بەرسە بولا ما؟
جاۋاپ: ورازا ايت كۇننەن بۇرىن ءپىتىر ساداقاسىن بەرۋگە بولادى.
سۇراق: ال، ورازا ايت كۇنىنەن كەشىكتىرسە شە؟
جاۋاپ: ورازا ايت كۇنىنەن كەشىكتىرسە دە، ءپىتىر ساداقاسىن بەرۋ موينىنان تۇسپەيدى. ايت كۇنىنەن كەيىن بولسا دا بەرۋى مىندەت. حاديستە: «... كىمدە- كىم (ايت) نامازىنا دەيىن بەرسە، ول ءپىتىر ساداقا بولادى. ال، (ايت) نامازىنان كەيىن بەرسە ول جاي ساداقالاردىڭ ءبىرى[2]»، - دەپ ايتىلعان.
سۇراق: ءپىتىر ساداقاسى كىمدەرگە بەرىلۋ كەرەك؟
جاۋاپ: كەز كەلگەن مال-دۇنيەنىڭ تۇرىنەن نيساپ مولشەرىنشە قاراجاتى جوق مۇقتاج جانە كەدەيلەرگە بەرىلۋى ءتيىس.
سۇراق:ءپىتىر ساداقاسىن بەرۋدىڭ سىرى نەدە؟
جاۋاپ: ابدۋللا بين ابباس (ر. ا.) ريۋايات ەتكەن حاديستە: «اللا ەلشىسى (س. ع. س.) ءپىتىر زەكەتىن (ساداقاسىن) ورازانى جامان ءىس-ارەكەت پەن جامان سوزدەن تازالاۋشى جانە مۇقتاجدارعا اس بولۋ ءۇشىن مىندەتتەدى[3]»، - دەلىنگەن.
سۇراق: ءپىتىر ساداقاسىنىڭ مولشەرى قانشا؟
جاۋاپ: ءپىتىر ساداقانىڭ مولشەرى جارتى ساع بيداي نەمەسە قۇرما، مەيىز جانە ارپا ونىمدەرىنەن ءبىر ساع.
سۇراق: ءپىتىر ساداقاسىن وسى اتالعان ونىمدەردەن باسقا تەڭگە، كۇرىش نەمەسە جۇگەرىمەن بەرسە، ونىڭ ۇكىمى قانداي؟
جاۋاپ: جوعارىدا كورسەتىلگەن (بيداي، قۇرما، مەيىز نەمەسە ارپا) ونىمدەرى مولشەرىنىڭ باعاسىنا شاقتاپ، ءپىتىر ساداقا نيەتىمەن بەرسە، ورىندالادى.
سۇراق: ساع دەگەنىمىز نە، ونىڭ مولشەرى قانداي؟
جاۋاپ: 1 ساع - 4 مۋددكە نەمەسە 5.1623 گرامعا تەڭ [4]. ياعني، شامامەن 1 ساع - 4كەلى. دەمەك، بيدايدان - 2كەلى، ال قۇرما، مەيىز جانە ارپادان - 4كەلى نەمەسە وسى ونىمدەردىڭ اقشالاي باعاسىن بەرۋگە بولادى.
«ازىرەت سۇلتان مەشىتى»
