اقان ساتايەۆ «رەكەتير» فيلمىنىڭ جالعاسىن تۇسىرەدى
ۋاقىتشا اتاۋى «رەكەتير-2. ۆوزمەزديە» كريمينالدىق دراماسى قىركۇيەكتەن باستاپ ءتورت قالادا: الماتىدا، قاراعاندىدا، استانادا جانە شىمكەنتتە تۇسىرىلە باستايدى. رەجيسسەر اقان ساتايەۆ فيلمنىڭ سەناريى ازىرگە جاريالانبايتىنىن، قۇپيا بولاتىنىن ايتقان ەدى.
ءتىپتى، فيلمدە باستى رولدە وينايتىن اكتەرلەردىڭ ءوزى ءالى سەناريمەن تولىق تانىسپاعان كورىنەدى. سوعان قاراماستان اقان ساتايەۆ از دا بولسا قۇپيانى اشىڭقىرادى. باستى كەيىپكەر سايان (سايات يسەمبايەۆ ) ەكرانعا ورالماق.
«رەكەتير» فيلمىنىڭ ءبىرىنشى ءبولىمىنىڭ سوڭىندا ساياندى ءۇيىنىڭ اۋلاسىندا ءۇش بەلگىسىز ادام جارالاپ، شالا جانسار كۇيدە قالدىرىپ كەتەدى. فيلم كەيىپكەردىڭ «مىنە، ءبارى دە ءبىتتى، وسى مەنىڭ بارلىق ءومىرىم. ايتارلىقتاي ەرەكشەلىگى جوق. ەگەر ماعان وسى ءومىرىمدى قايتا سۇرۋگە مۇمكىندىك بەرىلسە، باسقاشا بولار ما ەدى، بىلمەيمىن. ءبىتتى، ەندى ەشتەڭەنى وزگەرتۋ مۇمكىن ەمەس. اناشىمدى ايايمىن، جىلايتىن بولدى-اۋ. توڭىپ بارام. قازىر مەن كوزىمدى جۇمامىن» دەگەن سوزدەرىمەن اياقتالعان بولاتىن. فيلم باستى كەيىپكەردىڭ ولىمىمەن اياقتالعانداي اسەر قالدىرعان. الايدا ەكىنشى بولىمدە ونىڭ ءومىر سۇرۋىنە تاعى ءبىر مۇمكىندىك بەرىلەدى.
باستى رولدەردى سول باياعى اكتەرلەر سايات يسەمبايەۆ، جان بايجانبايەۆ، اسەل ساعاتوۆا، باۋىرجان ابىشيەۆ وينايدى. سونىمەن قاتار، قازىرگى تاڭدا قوسىمشا باستى رولدەرگە جانە باسقا دا رولدەرگە كاستينگ جاريالاندى. كاستينگكە بارلىق قازاقستاندىق قاتىسا الادى. ءتۇسىرۋ توبىنا 22-27 جاستاعى سىمباتتى جىگىتتەر، 20-25 جاستاعى سۇلۋ قىزدار كەرەك. انكەتانى مىنا racketeer2@mail.ru ەلەكتروندى پوشتاعا جىبەرۋگە بولادى.
.Tengrinews.kz
