00:26, 16 - شىلدە 2014 | GMT +5
يليا يلين استانادا قالىڭ جۇرتقا ءوز شەبەرلىگىن كورسەتتى - فوتو
استانا. قازاقپارات - ەكى دۇركىن وليمپيادا جەڭىمپازى، قازاقستاندىق اۋىر اتلەت يليا يلين كەشە استانادا worldclass جانە "استانا" پرەزيدەنتتىك كاسىبي سپورت كلۋبى اراسىندا مەموراندۋمعا قول قويۋ راسىمىنەن كەيىن وتكەن كىشىگىرىم سەمينار بارىسىندا ءوز شەبەرلىگىمەن ءبولىستى.
كۇنى كەشە لوندوندا وتكەن الەم چەمپيوناتىندا رەكوردتىق سالماقتى كوتەرىپ، ءدۇيىم جۇرتتى اسقان شەبەرلىگىمەن تامساندىرعان يليا بيىل دا بابىندا.
شەبەرلىك سىنىبى بارىسىندا تولاعايىمىز جاتتىعۋ ۇدەرىسىندە قولدانىلاتىن ءبىرقاتار ادىستەردى كورسەتىپ بەردى.
"سپورتپەن اينالىسىڭىزدار، جۇگىرىپ، باسسەينگە جازىلساڭىزدار دا جامان ەمەس. ءاربىرىمىز مىقتى بولساق، ەلىمىز دە كۇشتى بولادى"، - دەيدى چەمپيون.
وسىدان كەيىن يليا يلين جانكۇيەرلەرىنە ءوز قولتاڭباسىن تاراتىپ، ەستەلىك فوتوعا ءتۇستى.
ەسكە سالا كەتەيىك، لوندون وليمپياداسىنان كەيىن يليا ءبىلىم الۋ ماقساتىندا جارىستارعا قاتىسپاي، ءبىراز ۋاقىتقا دەمالىس العان بولاتىن. كەلەسى وليمپيادا ويىنىندا زىلتەمىرشى جاڭا سالماقتا 105 كەلىدە ونەر كورسەتۋدى جوسپارلاۋدا.
